Oblys ákimi qala turǵyndarymen kezdesti.
Tekeli qalasyna mamyr aıynda taza aýyz sý beriledi. Bul týraly oblys ákimi qala turǵyndarymen bolǵan kezdesý barysynda aıtty, dep habarlady Almaty-akshamy.kz
«Otyz úsh myńdaı turǵyny bar Tekeli qalasyna aýyz sý negizinen Qora ózeninen berilip kelgen. Kóktem mezgilinde qar sýynan, jańbyrdan ózen sýy laılanyp, qala halqy taza sýǵa zárý bolyp qalatyn. «Bul másele túbegeıli sheshiledi», - dedi búgin Qanat Bozymbaev Tekeli qalasynyń turǵyndarymen kezdesýinde. Sondaı-aq, ótken ǵasyrdan beri sheshilmeı kele jatqan ekologıa problemasy da oń sheshimin tappaq», - delingen Almaty oblysy ákiminiń baspasóz qyzmetiniń habarlamasynda.
Tekelide oblys ákimi osydan bir aı buryn bolyp, halyqtyń talap-tilekterine oraı jergilikti atqarýshy bılikke birqatar tapsyrma bergen bolatyn. Búgingi kezdesýde sol tapsyrmalardyń oryndalýyn baıandap, qalanyń aldaǵy damý baǵytyn aıtty.
Oblys basshysy tekelilikterge kúni keshe «Sanlaıt Investments» JSHS-men memorandýmǵa qol qoıǵanyn jetkizdi. Kelisimge sáıkes, Tekelidegi zıandy qaldyqtar qoımasyn rekýltıvasıalap, qoıma qaldyqtaryn jańadan salynatyn iri taý-ken baıytý kombınatynda shıkizat retinde paıdalaný qolǵa alynbaq. Osylaısha, qala shetindegi qaldyq qoıma tolyqtaı tazartylyp, qaladan alys jerge kóshirilmek. Joba 2022-2032 jyldarda iske asyrylady. Bul tekelilikterdiń sheshimin kútken eń ózekti máselesiniń biri bolatyn.
Al, bıyl temirdi qalpyna keltirýmen aınalysatyn, jyldyq qýaty 120 myń tonnalyq «Elektromarganes» JSHS zaýyty iske qosylady. Oǵan 15,6 mlrd. teńge ınvestısıa tartylyp, 1 myńdaı jumys orny ashylady.
Sondaı-aq, qaladaǵy apatty úılerdiń máselesi de kezeń-kezeńimen sheshiledi. Oblys ákiminiń aıtýynsha, Bóltirik sheshen, Qonaev, Koshevoı, Tóle bı kóshelerindegi apatty úılerdiń turǵyndaryn kóshirip ornalastyrýǵa qajetti qarjy bólýdi máslıhat qarastyrýda. Aldyńǵy saparda kóterilgen máselelerdiń ishinde birinshi, ekinshi Kordon turǵyndarynyń problemalary da sheshilgen. Atap aıtqanda, dárihana pýnkti quryldy, Qonaev kóshesiniń Koshevoı kóshesine burylysyn abattandyrýǵa, jıyrma kósheni ortasha jóndeýge jáne birinshi, ekinshi Kordondy jaryqtandyrýǵa jobalaý-smetalyq qujattamalar ázirlendi. Degenmen ınvestısıa tartý, jańa jumys oryndaryn ashý isi áli de artta qalyp keledi. Tekeliniń ınvestısıa tartýda oblystaǵy úlesi nebary 0,2%.
«Tekelidegi óndiristik aımaqta bos jer joq, kásiporyndardyń birazy maýsymdyq kezeńderde ǵana jumys isteıdi, qural-jabdyqtary tozǵan. Máselen, «Sýffle Qazaqstan» ashyqty zaýytynda shıkizat jetispeıdi, taza sýmen qamtýda qıyndyqtar bar. Sondyqtan oblysta arpa ósirý kólemin arttyryp, zaýytty óz shıkizatymyzben qamtamasyz etýdi tapsyramyn. Kásiporyndy taza sýmen qamtýǵa qajetti qujattardy tıisti mekeme jyldam daıyndap bitirýi kerek. Qala ákiminiń bul baǵyttaǵy jumysy sylbyr. Tekeliniń tabıǵı-rekreasıalyq áleýeti zor, ishki týrızmdi teń damytýǵa bolady. Ol úshin týrısik ınfraqurylymdy damytýdyń naqty jospary jasalýy tıis. Qalada shaǵyn jáne orta bıznesti de órkendetýge múmkindik mol. Soǵan qaramastan, Tekeliniń oblystaǵy shaǵyn jáne orta bıznestegi úlesi 1% ǵana. «Taldyqorǵan – Tekeli» magıstraldy gaz qubyry 2018 jyly tartylǵanymen, búginge deıin 51 jeke turǵyn úı ǵana gazǵa qosylǵan», - dedi Qanat Bozymbaev. Basqa da olqylyqtardy atap ótken oblys basshysy jumysty jandandyrýǵa qatysty naqty tapsyrmalar berdi.
Kezdesýge kelgen turǵyndar oblys basshysyna 50-ge jýyq saýal qoıdy. Ásirese, turǵyn úı-kommýnaldyq sharýashylyq, jol-kólik salalarynda qordalanǵan máseleler kóp ekeni baıqaldy.
