Taý týrızmi búkil álemde tanymal ári tabysty sanalady
Almaty taý klasterin damytý máseleleri boıynsha tıisti mınıstrlikter jetekshileri, oblys jáne qala basshylyǵy, iri taý-shańǵy kýrorttarynyń ıeleri «dóńgelek ústel» basyna jınaldy. Almaty oblysynyń ákimi Qanat Bozymbaevtyń bastamasymen uıymdastyrylǵan sharada Almaty taý klasteriniń áleýeti, basymdyq beriletin lokasıalary, ózekti máseleleri keńinen talqylandy. Jıyn qorytyndysynda úsh jaqty birlesken master-jospar ázirlenetin bolady, bul qujat Almaty oblysy men Almaty qalasy jáne bıznes qaýymdastyqtyń Almaty aglomerasıasy aýmaǵynda básekege qabiletti týrısik orta qalyptastyrýǵa baǵyttalǵan úsh jaqty is-sharalaryn úılestiretin bolady, - dep habarlaıdy Almaty-akshamy.kz Almaty oblysy ákiminiń baspasóz qyzmetine silteme jasap.
Kezdesýde Almaty oblysynyń ákimi Qanat Bozymbaev Jetisý aımaǵynda tabıǵı-rekreasıalyq, tarıhı-mádenı resýrstardyń mol bolýy týrızmniń barlyq túrlerin, sonyń ishinde taý týrızmin damytýǵa zor múmkindik berip otyrǵanyn atap ótti.
«Taý týrızmi búkil álemde tanymal ári tabysty sanalady. Búgingi kúni taý týrızmi men qysqy sport túrlerin jańa deńgeıde damytý qajettiligi týyndap otyr. Sondyqtan Almaty taý klasterin órkendetý máselelerin júıeli sheshý úshin birinshi kezekte osy salada jumys istep júrgen bıznes ókilderiniń pikirin tyńdaý biz úshin asa mańyzdy. Búgingi jıyndy osy maqsatta ótkizip otyrmyz», - dedi Qanat Bozymbaev.
Mádenıet jáne sport mınıstri Dáýren Abaev týrısik salaǵa memleket tarapynan jasalyp otyrǵan qoldaýlar men yntalandyrý sharalary týraly aıtyp berdi:
«Taý-shańǵy qural-jabdyqtary men tehnıkasyn satyp alý shyǵynynyń 25% memleket tarapynan óteledi. Qazir bul tehnıkalardyń tizimin keńeıtý máselesi qaralýda. Sol sıaqty týrısik nysandy, ıaǵnı ornalastyrý oryndary, týrıser keletin ortalyqtar jáne basqa da obektilerdi salý men qaıta jańǵyrtý shyǵyndarynyń 10% óteledi. Biz Kásipkerlik kodeksi sheńberinde basym dep tanylýy úshin ınvestısıalyq jobalar qunynyń eń tómengi shegin 2 mln. aılyq eseptik kórsetkishten 200 myń AEK-ke deıin tómendettik», - dedi D.Abaev. Ol mınıstrlik bul salany qoldaý sharalaryn jalǵastyratynyn jáne óńir bıznesin damytýǵa qatysty usynystardy qarastyrýǵa daıyn ekendigin aıtty.
Óz sózinde Ekologıa, geologıa jánen tabıǵı resýrstar mınıstriniń orynbasary Álıa Shalabekova turmystyq qatty qaldyqtardy shyǵarý men káriz júıelerine qatysty máselelerdiń ortaq júıeli sheshimi bolýy kerektigine toqtaldy. Bul rette týrıser úshin ekologıalyq taza ári qolaıly klımat qalyptastyrýda bıznes ókilderimen birlesip jumys isteýge daıynbyz dedi.
«Rakýrs Konsaltıń» kompanıasynyń seriktes basqarýshysy Dosym Qydyrbaev moderatorlyq etken basqosýda Almaty taý klasterin damytýdyń tıimdi joldary týraly kásipkerler pikirilerin bildirdi. Solardyń qatarynda «Oı-Qaraǵaı Lesnaıa skazka», «Aqbulaq», «Shymbulaq», «Tabaǵan Resort», «Kók Taý» taý-shańǵy kýrorttarynyń jáne «Pıoner» otbasylyq kýrortynyń basshylary da salany damytý joldary týraly usynystarymen, josparlarymen bólisti. Aıtylǵan pikirler negizinen servıs sapasyn kóterý úshin arnaıy mamandar daıarlaý, týrızm nysandaryna qoǵamdyq kólik qatynasyn jáne qoqys óńdeý isin uıymdastyrý, jasandy qar jasaý quralyn satyp alýǵa qarjylaı qoldaý kórsetý, balalardyń taýda tegin shańǵy tebýin mektep baǵdarlamasyna engizý, ınjenerlik ınfraqurylymmen qamtýǵa memlekettik qoldaý kórsetý máselelerine qatysty aıtyldy. Máselelerdi talqylaı kele kásipkerler taý klasterin damytý ıdeıasy tek birlese áreket etkende ǵana iske asatynyn jetkizdi.
«Eshkim de týrısik salany jeke dara damyta almaıdy. Tabysty nátıjege qol jetkizý úshin bul rette memleket pen bıznestiń kúsh-jigerin biriktirýimiz kerek», - dedi «Oı-Qaraǵaı Lesnaıa skazka» taý kýrortynyń prezıdenti Erlik Balfanbaev.
Jıyndy oblys ákimi Qanat Bozymbaev qorytyndylady:
«Eń aldymen kezdesýge qatysqan barshalaryńyzǵa rahmet aıtamyn. Búgingi otyrys negizinde hattama daıyndalyp, oǵan osy aıtylǵan usynys-pikirlerdiń barlyǵy engiziledi jáne jaýapty organdar belgilenedi. 2019 jyly qurylyp, jumysy tıimsiz ekenin kórsetken Almaty taý klasteri jobalyq keńseniń quramy men qurylymyn jáne jumys isteý ádisin qaıta qaraýdy usynamyn. Onyń ornyna bıznes ókilderiniń qatysýymen basqarý kompanıasyn qurý kerek. Klasterdi damytýǵa baǵyttalǵan barlyq qujattardy ózektendirý qajet. Sonymen birge is-sharalarymyzdy úılestiretin Taý týrızmi keńesin qurýymyz kerek. Onyń quramyna bıznes ókilderi, tıisti salalyq mınıstrlerdiń orynbasarlary, oblys pen qala ákimderiniń týrızmge jetekshilik etetin orynbasarlary, basqarma basshylary kirgeni jón. Keńes toqsan saıyn otyrysyn ótkizip, aǵymdaǵy máselelerdiń sheshimin jedel qarastyryp, kezeń-kezeńimen jasalatyn qadamdardy talqylaýy tıis. Barlyq daıyndalǵan qujattar qaıta jandandyrylady. Ol úshin biz Almaty taý klasterin damytý boıynsha úsh jaqty birlesken master-jospar ázirleýimiz kerek. Oǵan engizilgen jobalar komersıalyq jaǵynan tıimdi bolýǵa tıis. On kún ishinde sizderden iske tejeý bolyp otyrǵan zańnamalar men normatıvtik quqyqtyq aktilerge qatysty ózgerister men tolyqtyrýlar boıynsha naqty usynystar kútemiz. Biz máseleni abstraktyly talqylaýdan naqty qadamǵa kóshýimiz kerek. Almaty oblysynyń ekonomıkasy úshin týrızm basymdyq beriletin sheshýshi salanyń biri. Sondyqtan bul máseleler erekshe baqylaýymda bolady», - dedi Qanat Bozymbaev.