Aqtaý qalasy mańynda bolǵan qaıǵyly oqıǵanyń sebep-saldaryn tekserý úshin Úkimettik komısıa quryldy.
Úkimet qaýlysymen Aqtaý qalasy áýejaıynyń mańynda bolǵan Az Airlines áýe kompanıasynyń Embraer 190 ushaǵynyń apatqa ushyraý sebepterin tekserý boıynsha Úkimettik komısıa quryldy. Tıisti qaýlyǵa Premer-Mınıstr Oljas Bektenov qol qoıdy.
Komısıa quramyna Premer-mınıstrdiń orynbasary, Mańǵystaý oblysynyń ákimi, tótenshe jaǵdaılar, kólik, syrtqy ister, ishki ister, eńbek jáne halyqty áleýmettik qorǵaý, densaýlyq saqtaý mınıstrlikteriniń basshylyǵy, Bas kólik prokýrory kirdi.
Komısıaǵa oqıǵa ornyna dereý ushyp baryp, ushaqtyń apatqa ushyraý sebepterin jan-jaqty tekserýdi qamtamasyz etý, qaza tapqandardyń otbasylaryna jáne zardap shekkenderge alǵashqy kómek kórsetý sharalaryn qabyldaý tapsyryldy.
Qazaqstan Úkimeti Ázerbaıjan Úkimetimen bolǵan oqıǵanyń sebepterin jan-jaqty tergeý jáne alǵashqy kómek kórsetý boıynsha birlesip jumys isteýde.