Memleket basshysy Qazaqstan Respýblıkasynyń Qylmystyq zańnamasyn ońtaılandyrý máseleleri boıynsha keıbir zańnamalyq aktilerge ózgerister men tolyqtyrýlar engizý týraly Zańǵa qol qoıdy.
Jańa normalarǵa sáıkes, endi qalyńdyq urlaý – ıaǵnı, nekege turý maqsatynda adamdy erkinen tys alyp qashý – aýyr qylmys retinde qarastyrylady jáne 10 jylǵa deıin bas bostandyǵynan aıyrý jazasy kózdeledi, dep habarlaıdy aqshamnews.kz.
Qylmystyń aýyrlyǵyna qaraı úsh deńgeıli jaza qarastyrylǵan:
• 1-bólik – zorlyq-zombylyqsyz alyp qashý: 2000 AEK-ke deıin aıyppul (~7,8 mln teńge), túzeý jumystary nemese 2 jylǵa deıin bas bostandyǵynan aıyrý;
• 2-bólik – kúsh qoldaný nemese qorqytý arqyly alyp qashý: 5000 AEK-ke deıin aıyppul (~19,6 mln teńge), 3 jyldan 7 jylǵa deıin bas bostandyǵynan aıyrý;
• 3-bólik – densaýlyqqa aýyr zıan keltirý nemese ólimge ákelgen jaǵdaılar: 5 jyldan 10 jylǵa deıin bas bostandyǵynan aıyrý.
Sonymen qatar:
• Nekege májbúrleý úshin qylmystyq jaýapkershilik engizildi — kúsh qoldaný, materıaldyq táýeldilik nemese qyzmettik ókilettikti paıdalaný arqyly;
• Stalkıng – adamdy zańsyz qýdalaý men baqylaý – úshin de jaza belgilendi;
• QR QK 125-babyndaǵy eskertpe alynyp tastaldy: endi jábirlenýshini óz erkimen bosatqan adam da qylmystyq jaýapkershilikten bosatylmaıdy.
Bul ózgerister Qazaqstanda májbúrli nekeniń aldyn alý, áıelder men balalardyń quqyqtaryn qorǵaý maqsatynda qabyldandy jáne qoǵamda zorlyq-zombylyqtyń kez kelgen túrine «nóldik tózimdilik» qaǵıdatyn ornyqtyrýǵa baǵyttalǵan.