47 jastaǵy pasıenttiń bul syrqatqa shaldyqqanyna on jylǵa jýyqtaǵan. Bosanǵan kezde paıda bolǵan aýrýdyń asqynǵany sonshalyq, sońǵy kezde úlken dáretke otyrý úlken problemaǵa aınalypty. Jetinshi aýrýhananyń koloproktologıa bólimshesi mamandary oǵan 3-dárejeli kóteý degen dıagnoz qoıdy, dep habarlaıdy Almaty-akshamy.kz.
№7 QKA baspasóz qyzmeti taratqan habarlamaǵa súıensek, epıdýraldy jansyzdandyrý arqyly tik ishekke Longo operasıasy jasalǵan. Zamanaýı apparattyń kómegimen jasalǵan ota sátti ótken. Pasıent úshinshi kúni aýrýhanadan shyǵypty. Sebebi shaǵyn ınvazıvti ota orny dástúrli operasıalarǵa qaraǵanda tez jazylady, aýyrsyný sezimi de áldeqaıda tómen bolady. Pasıentter ekinshi kúni aıaqqa turyp, dáretke otyrǵanda qınalmaıdy. Jalpy, mundaı otadan keıin naýqastyń densaýlyǵy 7-8 kúnde qalypqa keledi, deıdi mamandar.
«Operasıadan beri 10 kún ótti, dárigerlerge alǵys aıtý úshin óz aıaǵymmen aýrýhanaǵa kelip turmyn. Maǵan baqyt syılaǵan, jumys isteýge, adamsha ómir súrýge múmkindik bergen aq halattylarǵa aıtar alǵysym sheksiz», - deıdi pasıent.
Bir aıta keterligi, ota mindetti áleýmettik medısınalyq saqtandyrý paketi sheńberinde jamaldy.
№7 aýrýhananyń koloproktologıa bólimshesi meńgerýshisi Marat Kalenbaevtyń sózine súıensek, Longo operasıasy kóteýdiń III-IV-shi stadıasynda qoldanylady. Ol tikishektiń anatomıalyq qurylymyn qalpyna keltirýge múmkindik beredi. Bul ádisti qoldanǵanda zaqymdanǵan ishekter kesip alynbaı, kerisinshe joǵary qaraı tartylady. İshektegi shyryshty qabyqtyń gemoroı túıinderinen joǵary ornalasqan bóligin kesip alyp tastaǵannan keıin túıinder ózdiginen túsip qalady.