Belgili qalamger, Qazaqstannyń eńbek sińirgen qaıratkeri, Prezıdent syılyǵynyń laýreaty Qalı Sársenbaıdyń eki birdeı kitabynyń tusaýy kesildi, dep habarlaıdy Almaty-akshamy.kz.
Onyń biri KSRO jáne Qazaqstannyń Halyq artısi, Qazaqstannyń Eńbek Eri Asanáli Áshimuly týraly. «Korıfeı» dep atalady. Qalı Sársenbaıdyń buǵan deıin de aty ańyzǵa aınalǵan Asanáli jaıynda jazǵan bir kitaby jaryq kórgen bolatyn. Al kezekti týyndysyna belgili tulǵanyń ónerdegi hám ómirdegi júrip ótken jolynda kezdesken oqıǵalar, tosyn qyrlary men syrlary baıandalady. Al ekinshi «Jýrnalıs – ómir barlaýshysy, jýrnalısıka – ómir mektebi» degen kitap kásibı jýrnalıs, halyqaralyq «Alash» ádebı syılyǵynyń laýreaty Janbolat Aýpbaevpen júrgizilgen suhbattarǵa arnalǵan, sol zamandasy jónindegi «1001-shi maqala» degen essemen túıindeledi. Jalpy, qazaq baspasózindegi tulǵalar jóninde, olardyń taǵlymy, jalpy ult baspasózindegi qyzyqty derekter, oqıǵalar baıandalatyn bul kitapty jýrnalısıka fakúltetterine qosymsha oqýlyq retinde usynýǵa bolady dep otyr pikir bildirýshiler.
Kitaptyń tanystyrylymyna elimizge belgili aqyn-jazýshylar, qoǵam qaıratkerlerimen birge, Qalı Sársenbaıdyń eki keıipkeri de qatysyp, lebizderin jetkizdi.
Kenjehan MATYJANOV, ǵalym:
– Qalı Sársenbaıdy «júrekti jýrnalıs» dep atar edim. Jáne muny eki túrli maǵynada aıtýǵa bolady. Bireýi – erligi, batyrlyǵy. Ekinshisi – qazaq óneri men mádenıetine degen súıispenshiligi. Qalekeńniń jýrnalısik eńbekteriniń negizgi bóligi – óner men mádenıet týraly. Buryn ákimderdiń is-qyzmeti jóninde aqpar ǵana berýmen shekteletin «Almaty aqshamy» gazetin qazaq mádenıeti, óneri, ádebıeti qaqynda oqylatyn dúnıeler basatyn rýhanı gazetke aınaldyrdy. Sonyń arqasynda atalǵan gazetke rýhanı jylylyq keldi. Ádette óner adamdary týraly ómirden ótip ketkennen keıin jazamyz. Tiri adam týraly jazý ońaı emes. Qalekeńdi júrekti jýrnalıs dep baǵalaıtynym sondyqtan. «Korıfeı» - búgingi derekti prozanyń tabysy.
Ámirhan MEŃDEKE, synshy:
– «Korıfeı» – Asanáli Áshimovtiń kúndelikteri týraly kitap. Sol týraly oı tolǵaıdy. Bir kúni Qalı Asekeńniń úıine barsa, úlken-úlken 29 kitapty kóredi. Muny halyqqa bermeısiz be dep jata jabysady. İshi tolǵan tarıhı ýaqyttyń shyndyǵy. Býnınniń kúndelikterin oqyǵanda, onyń aqsúıektigi, bekzattyǵy kórinip turady. Asekeńniń kúndelikterinen de sol iriligi, tektiligi baıqalady. «Asanálini taný – qazaqty taný» degen Qalıdyń sózi oryndy. Qalı tulǵa dep kimdi aıtýǵa bolatynyn dáleldedi. Jaqynda «Ana tili» gazetinen Qalıdyń «Notaǵa syımaǵan Nurǵısa» degen essesin oqydym. Oqyp otyryp eki ret ornymnan turyp kettim. Nurǵısanyń «Mahambet» sımfonıalyq poemasyn tyńdaǵanda Mosartty, Bethovendi tyńdaǵannan da kúshti áser alǵanyn jazypty. Óıtkeni ol – ózimiz. Qanymyz, janymyz. «Ultqa eń aldymen óz mýzykasy kerek» depti. Osyndaı dúnıelerdi stýdentterge oqytý kerek.
«Korıfeı» men «Jýrnalıs – ómir barlaýshysy, jýrnalısıka – ómir mektebi» - qalamgerdiń «Tulǵataný» serıasymen jaryq kórip otyrǵan jetinshi, segizinshi kitaby. «ARNA-B» baspasynan jaryq kórdi.
«Turan» ýnıversıetiniń tórinde ótken rýhanı kesh sońynda ýnıver rektory Rahman Alshanov Asanáli Áshimov pen Qalı Sársenbaıǵa «Qurmetti profesor» ataǵyn berdi.