Kemel Toqaevtyń shyǵarmashylyǵyna arnalǵan respýblıkalyq baıqaýdyń jeńimpazdary marapattaldy
Bıyl kórnekti jazýshy, ult qaıratkeri Kemel Toqaevqa – 100 jyl. Qalamgerdiń ǵasyrlyq mereıtoıyna oraı Jetisý oblysynda ulttyq oıyn túrlerinen halyqaralyq jarys uıymdastyryldy.
Saltanatty jıynda óńir basshysy Beıbit Isabaev Prezıdent Qasym-Jomart Toqaevtyń quttyqtaý hatyn oqyp berdi.
Sondaı-aq Kemel Toqaevtyń shyǵarmashylyǵyna arnalǵan respýblıkalyq baıqaýdyń jeńimpazdary marapattaldy.
«Kemel qalamger» atty rýhanı saıysqa elimizdiń ár aımaǵynan 300-den astam oqýshy men ustaz qatysqan. Olar esse, roman, proza janrlary boıynsha tyrnaqaldy týyndylaryn usyndy.
"Kemel Toqaev atyndaǵy qaıyrymdylyq qory osy konkýrsty jyl saıyn ótkizbek. Iaǵnı bizdiń kishkene turalap qalǵan detektıv janrymyz endi órkendeı bastaıdy dep esepteımin. Jaqsy talantty dúnıeler keledi. Jas jazýshylar bolady", - dedi Qazaqstan Jazýshylar odaǵynyń basqarma tóraǵasy Mereke Qulkenov.
Mereı toı aıasynda qazaq kúresinen Álem kýbogy sarapqa salyndy. Halyqaralyq dodada 22 memleketten 200-den astam balýan beldesti. Sondaı-aq sportshylar toǵyzqumalaq, asyq atý, sadaq atý jáne qoshqar kóterýden de baq synasty. Al shabondozdar qunan, top báıge jáne alamanda sáıgúlikteriniń babyn baıqap kórdi. Jarysqa 230-ǵa jýyq tulpar qatysty.