Almatyda Jeńistiń 79 jyldyǵyna oraı Qazaqstan Jazýshylar odaǵynyń basqarma tóraǵasy Mereke Qulkenov bastaǵan bir top zıaly qaýym maıdanger jazýshylardyń otbasyna arnaıy baryp, Jeńis kúni merekesimen quttyqtady, dep habarlaıdy almaty-akshamy.kz.
Aldymen Jazýshylar odaǵynyń basqarma tóraǵasy Mereke Qulkenov 28 panfılovshylar parkine baryp, el basyna kún týǵan sátte kerzi etigimen sý keship, Otan úshin janyn pıda etken qart maıdangerlerdiń rýhyna taǵzym etip, gúl shoqtaryn qoıdy. Sonan keıin, Juban Moldaǵalıev turǵan úıge bet burdy. Munda qalamgerdiń asyl jary Sofıa apaı kútip aldy. Til-kózden saqtasyn, 94-ke kelse de Sofıa apa tyń. Ótken kúnderge sheginis jasap, estelikterimen bólisti. 
«Biz jas kezimizde zaman qıyndaý boldy. Ol kezde nan qat edi. Ókimet alty júz gram nan beredi. Ony biz kók bazarǵa baryp, júgerige aýystyryp alamyz. Sóıtip sodan jasalǵan taǵamdy talqajaý etýshi edik. Basymyzdan qıyn kezder ótti ǵoı. Qazir beıbitshilik zaman ǵoı. Shúkir Allaǵa! Jumystaryńyzǵa sáttilik tileımin! Birneshe ýaqyttan úzilgen dástúrdi qaıta qolǵa alyp, bizderdi elep eskerip jatqandaryńyzǵa alǵys bildiremin», - dep aǵynan jaryldy.
Munan keıin, «Partızan qyzy», «Ormandaǵy ot», «Ton», «Qapastaǵy juldyzdar» atty shyǵarmalardyń avtory, Qazaqstan Jazýshylar odaǵy basqarmasynyń birinshi hatshysy jáne KSRO Jazýshylar odaǵynyń hatshysy, partızan-jazýshy Ádı Sháripovtyń úıine bardy. Munda da jazýshynyń asyl jary Klara apaı arnaıy kelgen qonaqtardy tik turyp qarsy aldy. Osynaý merekede arnaıy atbasyn tiregen Jazýshylar odaǵynyń sony bastamasyna óziniń dán rıza ekendigin jetkizdi. Aq batasyn berip, shyǵaryp saldy. 
Osydan keıin qazaq eliniń maqtanyshy, bilikti qolbasshy bolǵan Baýyrjan Momyshulynyń otbasyna kirip, batyrdyń kelini Zeınep apany arnaıy quttyqtady.
-Meniń istep júrgenim amanatqa adaldyq tanytý. Atam - shejire adam edi. Maǵan kóp áńgime aıtty. «Men saǵan aıtsam, qulaǵy bar dep aıtamyn. Sen balańa aıtasyń. Balań ary qaraı jalǵaıdy. Osylaısha qazaqtyń bir shańyraǵy saqtalady»,-deıtin. Mine, qazir atanyń aıtqandaryn elge aıtyp, tárbıege kerek bolar tustaryn sóz etip júrmiz. Ósirip jatqan bala-shaǵalaryńyz tárbıeli, ult úshin janyn berer azamat bolsyn! – dedi batyrdyń kelini aǵynan jarylyp.
Batyrdyń úıinen arqalanyp shyqqan jazýshylar at basyn toqsanǵa kelgenshe qalamy qolynan túspeı, irgeli dúnıeler jazyp ketken Ábý Sársenbaevtyń úıine burdy. Aıtý kerek, qalamger tek jazýmen ǵana shuǵyldanyp qoımaı, Atyraý oblysymen shektesetin Reseıdiń Astrahan oblysyn aralap shyqqan. Onda qazaqtar kóp ekenin, olardyń qaryny toq, kóılegi kók bolǵanymen, ulttyq mektepteri joq ekenin aıtyp, baspasózde sıkldi maqalalar jazyp, máseleni der kezinde kóterip, sol jaqtan qazaq mektepteriniń ashylýyna muryndyq bolǵan. Qazaqstannan kitap, oqýlyqtar jibertkizip, Astrahan telearnasynan qazaqsha habarlar berýge yqpal etken. Mine, naǵyz qaıratker, eljandy adamnyń shańyraǵynyń tútini túzý shyǵýǵa úles qosqan asyl jary Raıhan apaı kishkene syr bere bastaǵandaı kórindi. Desekte, qurmet kórsetip kelgen qonaqtarǵa alǵysyn bildirgen kelini Salıma keler jyly jazýshynyń 120 jyldyǵyn óz deńgeıinde atap ótýdi ótindi. Qazaqstan Jazýshylar odaǵynyń basqarma tóraǵasy Mereke Qulkenov bul jaıynda habardar ekenin jetkizdi. Jáne, mereıtoıǵa daıyndyq jumystary bastaý alǵanyn da aıtty. 
- Búgin elimizdiń barlyq óńirlerinde Jeńis merekesi tıisti deńgeıde atap ótip jatyr. Endi qalam men qarýdy qatar ustaǵan jazýshylarymyzdyń kóp emes. Solardyń úıindegi jarlaryna kirip, arnaıy quttyqtap shyǵýdyń ózi úlken tárbıe. Keshegi qalamgerlerdiń tútinin túzý shyǵaryp otyrǵan apalarymyzdy arnaıy quttyqtap, kóńilderin kóterdik. Qazaq kóńil kóńilden sý ishedi demeı me? Endeshe bir-birimizge demeý berý, qalyn suraý babalardan kele jatqan dástúr, dedi Qazaqstan Jazýshylar odaǵynyń basqarma tóraǵasy Mereke Qulkenov.
