Paıdaly jaz: Almaty oqýshylary janýarlar álemi týraly tegin bilim alady
9-16 jas aralyǵyndaǵy mektep oqýshylary jazǵy ýaqytta zoologıany oqyp, janýarlardy tamaqtandyryp, qorshaýyn tazalady, sonymen qatar qalanyń mýzeılerine bardy. Jas natýralıser úıirmesin Almaty haıýanattar baǵynyń ákimshiligi uıymdastyrdy. Zoomekteptegi sabaqtyń ereksheligi janýarlar álemin tereńirek zertteý jáne ondaǵy ań-qustardy kózben kórip, jaqynyraq tanyp-bilý.
«Balalar jaz boıy sabaqqa qýanyp bardy, bul zoomektepke jáne jalpy haıýanattar baǵyna degen qyzyǵýshylyqtyń kórsetkishi. Biz geımıfıkasıa elementterin qoldanamyz, balalardyń janýarlarǵa degen qyzyǵýshylyǵy men súıispenshiligin arttyrýǵa tyrysamyz. Janýarlar, tabıǵat jáne qorshaǵan álem týraly kóbirek bilgisi keletin balalar úshin ár sársenbi saıyn qosymsha tańdaý pánderin ótkizemiz. Mektepke balalardy oqý jylynyń sońynda – mamyrda qabyldadyq. Al tamyz aıynyń sońynda bizdiń oqýshylar emtıhan tapsyrady, bul alǵan bilimdi bekitý jáne ótken materıaldy qorytyndylaý», - dedi Almaty haıýanattar baǵyndaǵy zoomekteptiń jetekshisi Lúbov Sachkova.
Sabaq tegin, jumys kúnderi eki tilde, eki aýysymda ótkiziledi. Sondaı-aq balalar ekologıany, veterınarıa jáne zootehnıka negizderin, gerpetologıany, ornıtologıany jáne bıologıanyń basqa da baǵyttaryn zertteıdi. Uıymdastyrýshylar bul bilim balalarǵa bolashaq mamandyǵyn anyqtaýǵa kómektesetinine senimdi.
«Kýrs bitken soń árbir bala jas natýralıs atanyp, sertıfıkat alady. Qyrkúıek aıynda Almaty haıýanattar baǵynda qysqy zoomektepke qabyldaý bastalady. Bul týraly aqparat Almaty mádenıet basqarmasy men haıýanattar baǵynyń @almatymadeniet jáne @almatyzoo resmı Instagram paraqshalarynda jarıalanady», - dep sózin túıindedi zoomekteptegi qazaq tobynyń jetekshisi Jansaıa Ahmetkárimova.
