Stop Musor áleýmettik-ekologıalyq jobasy ekinshi jyl iske asýda.
Jyl saıyn aksıaǵa búkil álem boıynsha 180-nen astam el jáne 18 mıllıon erikti qatysady. Ekologıalyq qozǵalys aıasynda Qazaqstan Respýblıkasynyń ekologıa, geologıa jáne tabıǵı resýrstar mınıstrligi jáne qalalyq ákimdikterdiń qoldaýymen eko aksıa ótkizilýde, dep habarlaıdy Almaty-akshamy.kz Vecher.kz-ke silteme jasap.
«Memleket basshysy óz Joldaýynda atap ótkendeı, óskeleń urpaqty mektepter men JOO-larda ekologıalyq tárbıeleýge tıisti nazar aýdarý qajet. Qoǵamdaǵy ekologıalyq qundylyqtardy nyǵaıtýǵa baǵyttalǵan Birge – taza Qazaqstan ekologıalyq aksıasyn júıeli túrde ótkizgen jón. Qazaqstannyń ekologıalyq uıymdarynyń Qaýymdastyǵy halyqtyń saýattylyǵy men áleýmettik jaýapkershiligin arttyrýǵa, sondaı-aq Qazaqstan azamattary arasynda turmystyq qaldyqtardy jaýapty kádege jaratý mádenıetin tárbıeleýge baǵyttalǵan Stop Musor áleýmettik – ekologıalyq jobasyn ekinshi jyl iske asyrýda, - deıdi jobanyń baspasóz hatshysy Merýert Saılaýqyzy.
Naýqanǵa árkim óz úıin nemese páterin tazalaýdan bastap, eski jáne qajet emes zattardan aryla otyryp, belsendi qatysa alady, óıtkeni naýqan qaıta óńdeýge jáne suryptaýǵa baǵyttalǵan.
«Sonymen qatar, ruqsat etilmegen qoqysqa shaǵymdy stopmusor.kz saıty arqyly nemese sol ataýdaǵy mobıldi qosymshanyń kómegimen berýge bolady. Júktep alǵannan keıin aty-jónińizdi jáne elektrondyq meken-jaıyńyzdy kórsete otyryp, tirkeýden ótýińiz kerek. Odan keıin «shaǵym berý» batyrmasyn basyńyz, fotosýretti júktep, qoqys tastaıtyn jerdiń mekenjaıyn kórsetińiz», - dep túsindirdi Merýert Saılaýqyzy.