Taldyqorǵanda polıseıler túnde jasóspirim júrgizgen kólikti qýyp júrip toqtatty, dep habarlaıdy Aqshamnews.kz tilshisi Polisia.kz-ke silteme jasap.
16 qarashaǵa qaraǵan túni, shamamen 03:00-de patrúldik polısıa qyzmetkerleri Qabanbaı batyr kóshesinde jyldamdyqty shamadan tys asyryp, qaýipti manevr jasaǵan Mitsubishi Pajero kóligin toqtatpaq boldy. Alaıda júrgizýshi tártip saqshylarynyń toqtaý týraly zańdy talabyn elemeı, jyldamdyqty arttyryp, qashýǵa tyrysqan.
Patrúldik ekıpaj dereý qýǵyndy bastap, aqparatty basqa narádtarǵa joldaǵan. Birneshe mınýtqa sozylǵan qýdalaý nátıjesinde kólik kópqabatty úıdiń aýlasynda buǵattalyp toqtatyldy.
Tekserý kezinde kólikti 2009 jyly týǵan, júrgizýshi kýáligi joq jasóspirim basqarǵany anyqtaldy. Ol ustalyp, polısıa bólimine jetkizildi. Oqıǵa týraly onyń ata-anasyna habarlandy. Kólik arnaıy aıypturaǵyna qoıyldy.
Jasóspirimge qatysty:
-
polıseıdiń zańdy talabyna baǵynbaý,
-
júrgizýshi kýáliginsiz kólik júrgizý
faktileri boıynsha materıaldar sotqa jiberildi.
Sonymen birge, ata-anasyna qatysty:
-
balanyń túnde eresekterdiń qaraýynsyz júrmeýin qamtamasyz etpeý,
-
tárbıeleý jónindegi mindetterin tıisinshe oryndamaý
boıynsha ákimshilik hattamalar toltyryldy.
Polısıa jasóspirimniń qasynda taǵy úsh kámeletke tolmaǵan dosy bolǵanyn anyqtady. Olardyń ata-analaryna da balalardyń túngi ýaqytta qaraýsyz júrgeni úshin ákimshilik protokoldar rásimdeldi.
Oqıǵa boıynsha tergeý sharalary jalǵasyp jatyr.