Almatyda «Qazaqstan temir joly» UK» AQ-nyń enshiles kompanıasy – «Kedentransservıs» AQ bazasynda jańadan salynǵan ZHETYSU logıstıkalyq termınaly ashyldy. Aýqymdy ınfraqurylymdyq joba qytaılyq Xi'an Free Trade Port Construction and Operation Co., Ltd. (QHR) kompanıasymen halyqaralyq áriptestik aıasynda júzege asqan.
Saltanatty jıynǵa Almaty qalasynyń ákimi Darhan Satybaldymen qatar, «Samuryq-Qazyna» AQ basqarma tóraǵasy Nurlan Jaqypov, Almatydaǵy QHR Bas konsýly Szán Veı, Shensı provınsıasynyń gýbernatory Chjao Gan qatysty. Sondaı-aq Sıan qalasynyń QKP hatshysy Fan Hýnveı telekópir formatynda tileýlestigin bildirdi.
Termınal logıstıkalyq shyǵyndardyń tómendeýin qamtamasyz etedi, kólik baılanysyn kúsheıtedi jáne halyqaralyq júk tasymalynyń tıimdiligin arttyrady. Keshenniń jobalyq qýaty – jylyna 115000 TEU.
Óz sózinde Almaty ákimi Darhan Satybaldy: «Almaty – eki eldiń qarjy, iskerlik jáne saýda ortalyǵy, sondaı-aq Eýropa men Azıa arasyndaǵy negizgi baılanystyrýshy júıe. Sondyqtan, bul termınaldyń ashylýy kezekti joba ǵana emes. Ol tranzıttik marshrýttardyń múmkindikterin keńeıtip, jańa jumys oryndaryn ashýǵa sep bolady. Sonymen birge, qala ekonomıkasyna aıtarlyqtaı yqpal etedi», - dep atap ótti.
Resmı is-shara qarsańynda atalǵan termınalǵa Sıan qalasyndaǵy (QHR) Qazaqstan-Qytaı júk termınalynan jóneltilgen alǵashqy konteınerlik poıyz keldi. Al strategıalyq áriptestik pen ekologıalyq jaýapkershiliktiń belgisi retinde eki eldiń ókilderi jańa termınal aýmaǵyna aǵash otyrǵyzdy.
ZHETYSU termınaly – tasymal dálizderiniń negizgi núktesinde ornalasqan. Ol júk aǵyndaryn shoǵyrlandyrýdyń strategıalyq ortalyǵyna ári Qazaqstannyń eń iri ımporttyq logıstıkalyq habyna aınalady dep kútiledi. Jańa termınal Qytaı Halyq Respýblıkasynan keletin júkti óńdeýge, shoǵyrlandyrýǵa jáne bólýge baǵyttalǵan. Tıisinshe, Almatynyń óńirdiń iri logıstıkalyq toraby retindegi tranzıttik rólin nyǵaıtady.
Anyqtama:
Termınaldyń jalpy alańy 9,8 gektar. Konteıner alańy 9200 sharshy metr jáne 1 101 TEU deıin bir rettik saqtaýǵa múmkindigi bar. Qoıma úı - jaılarynyń aýmaǵy 23 400 sharshy metrge jetedi, komersıalyq avtokólikterge arnalǵan turaq aımaǵy-8 900 sharshy metr.