Alla Taǵala pendesiniń keıbir saýapty amaldarynyń dárejesin qajylyqtyń saýabymen teńestirgen. Qajylyq – bes paryzdyń biri. Sondyqtan árbir musylman ómirinde bir márte qajylyq paryzyn óteýge mindetti. Degenmen, dinimizde qajylyqtyń saýabymen teń túsetin amaldar da joq emes eken. Bul amal qajylyq paryzyn almastyra almasa da, saýaby ushan-teńiz.
Taza nıet
Eń áýeli nıettiń tazalyǵy musylman adam úshin asa mańyzdy. Qıamet kúni bolǵanda, árbir pende óziniń amal dápterin kóredi, sonda arasynan qajylyq, zeket, tipti sadaqanyń da saýabyn kóredi. «Bálkim, bul meniń amal dápterim emes shyǵar. Men bulardy jasaǵan joq edim ǵoı», - deıdi eken pende. Sonda Alla Taǵala qulyna: «Bul seniń amal dápteriń», – deıdi. Álgi adam Jaratýshyǵa: «Ýa, Jaratýshy Iem! Men bul amaldardy jasaǵan joqpyn», - deıdi. Haq Taǵala bolsa: «Seniń bul amaldardy jasamaǵanyńdy bilemin. Alaıda seniń nıetiń: «Eger qarajatym bolsa, meshit salar edim, muqtajdarǵa járdemdesip, qajylyqqa baratyn edim» dep turatyn. Nıet-yqylasyń shynaıy ári tek Meniń razylyǵyma qol jetkizý bolǵandyqtan, nıetińdegi amaldardyń saýaby da jazyldy», – deıdi.
Meshitke dáretpen barý
Alla Elshisi: «Kimde-kim dáret alyp, jamaǵatpen namaz oqý úshin meshitke barsa, ıhram kıip, qajylyq paryzyn ótegendeı saýapqa ıe bolady. Al eger Duha namazyn oqıtyn bolsa, kishi qajylyqpen teń saýapqa keneledi».
Nápil namaz oqý
Paıǵambarymyz: «Kimde-kim tań namazyn meshitte jamaǵatpen oqyp, kún shyqqansha zikir etip (Allany eske alý), kún shyqqannan soń eki bas nápil namaz oqysa, úlken qajylyq pen ýmranyń saýabyndaı saýapqa keneledi», – degen.
Meshitte bilim berý nemese bilim alý
«Alla Elshisi: «Kimde-kim bilim alý úshin ne bolmasa bilim úıretý úshin meshitke baratyn bolsa, qabyl bolǵan qajylyqtyń saýabyndaı saýapqa ıe bolady», – degen.
Ata-ananyń razylyǵy
Birde paıǵambarymyzdan bir sahaba: «Men Alla jolynda qyzmet etkim keledi, ne qyzmet jasaýǵa bolady?» – dep suraıdy. Áz elshi álgi sahabadan: «Áke-shesheń tiri me?» – dep suraǵanda: «Anam bar», – dep jaýap beredi. Sonda Alla Elshisi: «Endeshe, anańa qurmet kórsetip qal. Anańnyń razylyǵyna qol jetkizýdiń joldaryn tap. Sonda qajylyq pen ýmranyń sabaýyndaı saýapqa kenelesiń», – degen eken.
«Almaty-akshamý», №4 (6297) 12 qańtar, 2023 jyl