Endigi ýaqytta qaıyrymdylyq maqsatynda halyqtan jylý jınaıtyn blogerler aldyn ala kómekke muqtaj kisimen nemese uıymmen kelisimshartqa qol qoıýy tıis, dep habarlaıdy Almaty-akshamy.kz QazAqparatqa silteme jasap.
«Blogerler zańǵa baǵynbaı, kelisimshart jasamaı, qaıyrymdylyq is úshin dep halyqtan aqsha jınasa, ol zańsyz áreket bolyp esepteledi. Iaǵnı ol alaıaqtyq. Ekijaqty kelisimge kelý qaıyrymdylyq jasaý kezinde túsinispeýshilik, daý-damaı týyndaǵan jaǵdaıda máseleni zańmen retteý úshin engizilip otyr. Kelisimge kelse, qaıyrymdylyq úshin jınalǵan qarjyǵa qatysty eshqandaı artyq suraq týyndamaıdy. Mysaly, bloger bir kisige qaıyrymdylyq jasaý úshin qarjy jınaýdy bastaǵan, negizi 7 mln teńge kerek bolǵan, nátıjesinde 15 mln teńge jınalǵan. Óz kezeginde bloger kómekke muqtaj janǵa 7 mln teńge berip, qalǵan somany basqa maqsatqa jumsaıtyndyǵyn aıtqan. Sodan keıin ekijaqty túsinispeýshilik týyndaǵan», - dedi QR Aqparat jáne qoǵamdyq damý mınıstrligi Azamattyq qoǵam isteri komıtetiniń tóraǵasy Madıar Qojahmet Ortalyq komýnıkasıalar qyzmeti alańynda ótken baspasóz máslıhatynda.
Onyń aıtýynsha, elimizde búginge deıin blogerlerdiń halyqtan qaıyrymdylyq úshin qarjy jınaý máselesi nazardan tys bolǵan.
«Eger bloger qandaı da bir qaıyrymdylyq qordyń atynan jaqsylyq jasamaq bolsa, onda sol uıym men bloger arasynda kelisim jasalýy tıis. Al eger bloger ózdiginen qaıyrymdylyqpen aınalyssa, onda kómek kórsetetin adammen kelisimniń bolýy mindetti. Iaǵnı kimge kómek kórseteıin dep jatyr, sol adammen kelisim jasalady», - dedi QR Parlamenti Májilisiniń depýtaty Vera Kım.