Altyn júrekti jandar marapattaldy
Qaıyrymdylyq qanynda bar qazaq halqy sońǵy jyldary bul baǵyttaǵy jumystardy tipti údete tústi. Qoǵamymyzda jekelegen qaıyrymdy jandardyń qoldaýymen úıli bolǵan, emine qarajat jınalǵan nemese muqtajdyǵyna qaıyrymdylyq arqyly qoly jetken azamattar kóbeıe tústi. Óz kezeginde memleket tarapynan da túrli jumystar qolǵa alynyp onlaın sadaqa berý joldary jetildirilip, elimizde eriktiler jylynyń jarıalanýy, qaıyrymdylyq týraly zań jobasy qolǵa alynyp, eriktiler sanynyń eselep ósýi, qaıyrymdylyq jasaǵysy keletinderdiń sanynyń ósýine de yqpal etti. Árıne mundaı jaǵdaıda olardy yntalandyryp, qoǵam tarapynan qoldap ta otyrý qajet. Osyny maqsat etken ult janashyry Dınara Berdimurat ótken aptada bir top qaıyrymdy azamattardy «Altyn júrek» nomınasıasymen marapattady.
Marapattalǵandardyń barlyǵy qaltasy qalyń bolmasa da qaıyrymdylyq jasaýdy maqsat etken qarapaıym jandar. Sol maqsattarynyń arqasynda kóp bolyp birigip, tamshydan quralǵan teńizdeı meıiriminiń arqasynda talaı muqtajdyń kádesine jarap otyr.
Sharanyń ashylýyna sóz alǵan el janashyry, jaqynda ǵana memleket basshysy Qasym-Jomart Kemeluly Toqaevtyń alǵys hatymen marapattalǵan, "Namys", "Batyr shapaǵaty" tós belgileriniń ıegeri Jumaǵalı Gúlnar İzimǵalıqyzy mundaı sharalardyń mańyzy zor ekenin atap ótti.
«Altyn júrek» sharasyn uıymdastyrýshy Dınara Berdimurat hany:
«Memleket basshysy Qasym-Jomart Toqaev Qazaqstanda qaıyrymdy azamattardyń tizimi jasalýy qajet ekenin atap ótken bolatyn. «Sonymen qatar, bizge áleýmettik baǵyttalǵan qyzmetti yntalandyrý men yntalandyrýdyń naqty jáne tıimdi quqyqtyq tetikteri qajet» degen edi. Osy baǵytta «Altyn júrek» sharasyn uıymdastyryp qaıyrymdy jandardyń áreketteri qoǵamnyń qoldaýyna ıe ekenin, myna álem meıirimdi azamattarmen ádemi ekenin sezindirgim keldi. Ultymyzda qalyptasqan dástúr boıynsha kóp adam qaıyrymdy is-áreketin jasyrýǵa tyrysady. Jasyryn qalaıyn dep jatady. Bul durys ta shyǵar. Biraq olardyń áreketin basqalarǵa úlgi bolýy kerek. Damyǵan elderde qaıyrymdylyq sharalary durys jolǵa qoıylǵan. Alaıaqtar aralasyp ketýi nemese qaıyrymdylyq nıetteriniń joldan basqaǵa burylyp ketýine jol joq. Qazirgi tańda elimizde qolǵa alynǵan sharalardyń arqasynda mundaı keleńsizdikter tyıylaryna senem. Memleket basshysy da «Meniń tapsyrmam boıynsha qaıyrymdylyq týraly jańa zań daıyndalýda, ol osy saladaǵy bar olqylyqtardy joıady. Qaıyrymdylyq jáne eriktiler uıymdary olarǵa jumys jasaý úshin qajetti jaǵdaılardy, onyń ishinde memleketpen jáne bıznespen qamtamasyz etetin naqty quqyqtyq mártebeni alýy kerek» degen bolatyn. Sondyqtan meniń búgingi ótkizip otyrǵan sharam memleket basshysynyń osy oıyn qoldaý maqsatynda qolǵa alynǵan edi» deıdi «Altyn júrek» sharasyn uıymdastyrýshy Dınara Berdimurat.
Marapattalǵan jandar da elimizdiń ár qıyrynan jınalǵan. Iaǵnı shara uıymdastyrýshylary marapatqa laıyq jandardy respýblıka boıynsha izdestirgen.
Máselen Tileýbaıqyzy Raýshan Qyzylorda qalasynan. «Ondasyn ı K» jaýapkershiligi shekteýli seriktestiktiń basshysy ári quryltaıshysy. Qazirgi tańda 60 shaqty áıel analardy jumyspen qamtyp otyr. Tipti biraz qyz-kelinshekterdi óz qarajatymen kýrstar oqytyp aspaz, kondıter mamandyqtaryn alyp berip, jumysqa qosyp, olardyń otbasylyq máselelerin de nazarynan tys qaldyrmaǵan. Jyl saıyn respýblıkalyq «Mektepke jol» sharasyna da qoldaý kórsetedi. Osyndaı isterge muryndyq bolǵany úshin Qyzylorda oblysy ákiminen, Qalalyq bilim bóliminen «Alǵys hatpen, Gramotalarmen» marapattalǵan. Taǵy biri jyl saıyn Balalardy qorǵaý kúnine oraı balalar úıine qomaqty qaıyrymdylyq sharalaryn jasaýdy ádetke aınaldyrsa, taǵy biri jalǵyz basty analardy qoldap, únemi olardy úıli, kásipti etýge tyrysyp júrgen adamdar. Dál osyndaı júz shaqty azamatty «Altyn júrekke» laıyq kórgen sharada «Amanat» partıasynyń ókilderi kelip marapattaryn óz qoldarymen tapsyrdy.
"Altyn júrekti" jandarǵa marapatyn tapsyrǵan qarjylyq saýattylyq jáne Bıznesti júıeleý sarapshysy, ınvestor, kásipker, "Namys" tósbelgisiniń ıegeri Esengeldın Jeńis pen kásipker, "NurArIman" balabaqshasynyń jáne qurylys kompanıasynyń basshysy, ult janashyry Shaıǵalıeva Baqyt Ǵalıqyzy marapattalǵandardyń barlyǵy qurmetke laıyq ekenin atap ótti.
Osy oraıda Dınara Berdimurat «Negizi elimizde qaıyrymdy jandar kóp. Olar keıde kómekterin naqty qaıda baǵyttaryn bilmeı jatady. Birneshe ret balalar úıine nemese DSP-men aýyratyn balalarǵa arnap sharalar uıymdastyrý kezinde osyny túsindim. Sondyqtan qaıyrymdylyq isteriniń júıelengeni, qaıyrymdylyqtyń naǵyz muqtaj jandy taýyp barǵany mańyzdy. Aldaǵy ýaqytta qaıyrymdylyq baǵytyndaǵy isterdi kóbeıtip, mesenattardy yntalandyryp otyrý sharalaryn jalǵastyra berýimiz kerek. Óıtkeni qaıyrymdylyq júrekterdi jumsartady, qoǵamymyzdy qaıyrymdy ete túsedi» deıdi.