Qaırat Satybaldyulynyń 120 mıllıon dollar aktıvteri memleketke qaıtaryldy
Qaırat Satybaldyulynyń aktıvteri memleketke qaıtaryldy, - dep habarlaıdy almaty-akshamy.kz Sybaılas jemqorlyqqa qarsy is-qımyl agenttigine silteme jasap.
Qazaqstan Respýblıkasynyń Sybaılas jemqorlyqqa qarsy is-qımyl agenttigi Qaırat Satybaldyulyna jáne basqa da adamdarǵa qatysty júrgizilip jatqan tergep-tekserý sheńberinde elden zańsyz shyǵarylǵan aktıvterdi, onyń ishinde qylmystyq jolmen alynǵan aqsha qarajatyn jáne ózge de múlikti qaıtarý jóninde sharalar qabyldap jatyr.
"Tek bıylǵy jeltoqsanda Sybaılas jemqorlyqqa qarsy qyzmet qabyldaǵan sharalardyń nátıjesinde Satybaldyulynyń jalpy somasy 120 mıllıon AQSH dollaryna, ıaǵnı 55,4 mıllıard teńgeden asatyn aqshalaı qarajatyn qaıtarýdy qamtamasyz etti", - delingen habarlamada.
Kórsetilgen qarajat memleketke keltirilgen zalaldy óteý esebine respýblıkalyq búdjetke jiberilgeni aıtyldy.
"Osylaısha, Sybaılas jemqorlyqqa qarsy qyzmet sońǵy 2 jylda búdjetke jáne kvazımemlekettik sektor sýbektilerine 912 mıllıard teńgeden astam somaǵa múliktik aktıvter men aqshalaı qarajatty qaıtarýdy qamtamasyz etti.
Buryn aıtylǵandaı, olardyń qataryna ákimshilik ǵımarattar, eksklúzıvti zergerlik buıymdar, sándi úıler, páterler men avtomobılder, aksıalar men kompanıalardaǵy úlester, temirjol joldary men aqsha qarajattary, sonyń ishinde shetelden alynǵan qarajattar kiredi".
Zańsyz shyǵarylǵan aktıvterdi qaıtarý boıynsha jumys jalǵasyp jatqany aıtyldy.