30 qyrkúıekte fýtbol jankúıerleriniń nazaryn aýdaratyn úlken kezdesý ótpek. Qazaqstannyń tanymal klýby "Qaırat" álemdik alyptardyń biri "Realmen" jasyl alańda jolyǵady. Bul oıynǵa sportsúıer qaýym ǵana emes, eldiń saıası tulǵalary da qyzyǵýshylyq tanytyp otyr. Aqshamnews.kz tilshisi Májilis depýtattarynan mach týraly surap bildi.
Amanjol Áltaı: "Jeńilsek te – abyroı"
Depýtat Amanjol Áltaı "Qaırattyń" Ispanıa alpaýyt klýbyna qarsy oınaıtynynyń ózi úlken mártebe ekenin atap ótti.
"Másele "Qaırattyń" "Realdy" jeńýinde emes. Eń bastysy – bizdiń komandamyzdyń álemniń eń myqty fýtbol ujymdarynyń birimen bir alańda oınaýynyń ózi úlken abyroı. Sondyqtan "Qaırat" jeńse de, jeńilse de biz úshin qýanysh. Boljam boıynsha esep 2:1 bolýy múmkin, biraq "Realdyń" paıdasyna. Eger 1:1 esebimen teń tússe, ol tipti tamasha bolar edi. Qalaı bolǵanda da, "Qaıratqa" jeńis pen sáttilik tileımiz", – dedi Amanjol Áltaı.
Erlan Saırov: "Teń oıyn – biz úshin jeńis"
Al Erlan Saırov "Qaıratqa" sáttilik tilep, oıynnyń teń túskenin qalaıtynyn jetkizdi.
"Qaıratqa" sáttilik tileımin. Degenmen eki komandanyń salmaq dárejesi ártúrli ekeni belgili. Sol sebepti teń nátıjeniń ózi Qazaqstan fýtboly úshin úlken jeńis bolmaq. Shyn júrekten oıynnyń teń aıaqtalǵanyn qalaımyn", – dedi depýtat Erlan Saırov.
Eske salaıyq, keshe tarıhı oıynǵa bılet satylymy ashylǵan edi. Kezekte 300 myńǵa jýyq adam turǵan.