Almaty ákimi 339 oryndyq jańa stýdenttik jataqhanamen tanysty
Búgin Almaty ákimi Darhan Satybaldy Halyqaralyq bilim berý korporasıasynyń (HBBK) jańa stýdenttik jataqhanasyn aralady, - dep habarlaıdy Aqshamnews.kz.
339 orynǵa arnalǵan bul nysan korporasıanyń bilim berý ınfraqurylymyn damytýǵa baǵyttalǵan aýqymdy baǵdarlamasynyń bir bóligi.
Jańa ǵımarattyń basty ereksheligi – jataqhana komfort-klass deńgeıinde salynǵan. Ár bólme jeke asúımen, sanıtarlyq torappen jáne jumys aımaǵymen jabdyqtalǵan, bul stýdentterdiń turmysyn barynsha yńǵaıly etip, apartament úlgisine jaqyndatady. Ǵımaratta birlesip oqý men jobalyq jumysqa arnalǵan kovorkıng aımaqtary qarastyrylǵan. Jataqhana «aqyldy kampýs» júıesine biriktirilgen, ol qaýipsizdik pen qoljetimdilikti ortalyqtan basqarýǵa múmkindik beredi. Jalpy aýmaǵy – 3 822,4 sharshy metr, ınvestısıa kólemi 15 mlrd teńgeden asty.
Sapar barysynda Almaty ákimi elimizge óz mamandaryn daıarlaý qajettigin atap ótti.
«Mańyzdysy – túlekterdiń eńbek naryǵynda básekege qabiletti bolýy. Qazir biz jıi sheteldik mamandarǵa júginemiz. Qazaqstandyq mamandar joqtyń qasy. Sondyqtan ózimizdiń kadrlardy ósirip, olar qala ıgiligi úshin jobalardy júzege asyrýy qajet», – dedi Darhan Satybaldy.
Stýdentterdiń tájirıbelik daıarlyǵy úshin HBBK bazasynda zamanaýı zertteý alańdary jumys isteıdi. Olardyń qatarynda Samsung jáne JBL kompanıalarymen birlesken jobalar bar. Bul bolashaq arhıtektorlarǵa, ınjener men dızaınerlerge álemdik deńgeıdegi qural-jabdyqta kýrstyq jáne dıplomdyq jumystar oryndaýǵa múmkindik beredi.
Ýnıversıtet kampýsynda FabLab (Fabrication Laboratory), qalalyq zertteý zerthanasy, seısmıkalyq áserdi zertteýge arnalǵan biregeı seısmoplatforma, dron zerthanasy, qurylys geotehnıkasy zerthanasy, sondaı-aq O.Iý. Pák atyndaǵy jeldetý jáne kondısıonerleý boıynsha mamandandyrylǵan zerthana jumys isteıdi.
Aıta keteıik, 2007 jyly qurylǵan Halyqaralyq bilim berý korporasıasynyń (HBBK) quramyna Qazaq bas sáýlet-qurylys akademıasy (QazBSQA) jáne Qazaq-Amerıka ýnıversıteti (QAÝ) kiredi. Búginde korporasıada 16 myńnan astam stýdent oqyp jatyr. HBBK halyqaralyq baǵdarlamalardy damytyp, álemniń jetekshi ýnıversıtetterimen tyǵyz áriptestik ornatyp keledi.
Almaty ákimdigi stýdentter men jastardyń áleýmettik jaǵdaıyn jaqsartýǵa erekshe kóńil bólip, bilim alýǵa jáne ómir súrýge qolaıly zamanaýı keńistikterdi qalyptastyrýda.