Kıprden kelgen jankúıerler Almatynyń sulýlyǵyna tánti bolyp, «Qaırat» klýbynyń jeıdesin satyp aldy. Búgin Ortalyq stadıonda ótetin almatylyq «Qaırat» pen kıprlik «Pafos» arasyndaǵy mańyzdy kezdesý aldynda stadıon mańynda qyzý daıyndyq júrip jatyr, - dep habarlaıdy Aqshamnews.kz tilshisi.
Quqyq qorǵaý qyzmetkerleri men volonterlermen qatar, stadıon aýmaǵynda eki komandanyń jankúıerleri de jınalyp jatyr. Óz komandasyn qoldaý úshin Almatyǵa Kıprdan da sheteldik jankúıerler keldi.
Kıprlik jankúıerler Dımıtrıs Astros pen Pereklıs Zavrıdıs Almatyda alǵash ret ekenin aıtyp, qalanyń qonaqjaılyǵy men tazalyǵyna, ásemdigine erekshe áser alǵandaryn jetkizdi. Mach aldynda olar «Qaırat» fýtbol klýbynyń fırmalyq dúkenine kirip, kádesyılar satyp alǵan. Olardyń biri almatylyq klýbtyń jeıdesin estelik ári qurmet belgisi retinde alǵanyn aıtty.
"Biz Almatyda alǵash retpiz, bul qala bizdi tańǵaldyrdy. Munda óte ádemi, taza ári adamdar meıirimdi. Men "Pafostyń“ jeńisine senemin, biraq "Qaırat“ ta myqty qarsylas. Tipti sizderdiń taýlaryńyzǵa da baryp úlgerdim. Umytylmas áser qaldyrdy!" - dedi Dımıtrıs Astros.
Al Pereklıs Zavrıdıs Almatyny zamanaýı ári sportty súıetin qala retinde sıpattap, mundaǵy erekshe atmosferany atap ótti:
"Buryn "Qaırat“ jaıly kóp bile bermeıtinmin, biraq klýb Chempıondar lıgasyna shyqqannan keıin qyzyǵýshylyǵym artty. Búgin ádemi oıyn kútemin. Almaty - taza, jaıly jáne óte jyly qala eken",- dedi jankúıer.
Aldaǵy mach tek sporttyq báseke emes, túrli eldiń jankúıerlerin biriktiretin merekelik shara bolmaq. Almaty taǵy da sport arqyly dostyq pen halyqaralyq yntymaqtastyqtyń qalasy ekenin dáleldep otyr.