Almatyda Respýblıka kúnine arnalǵan aýqymdy «Janashyr júrek» aksıasy bastaldy. İs-shara qalalyq eriktiler front-keńsesiniń bastamasymen jáne Jastar saıasaty basqarmasynyń qoldaýymen ótkizilip jatyr.
16-25 qazan aralyǵynda aksıa aıasynda 20-dan astam túrli is-shara uıymdastyrylýda. Solardyń qatarynda «Qamqor bol» úısiz jandarǵa ystyq shaı men taǵam taratý, qarttar úıinde shyǵarmashylyq kesh ótkizý, ashyq aspan astyndaǵy J-FEST konserti, jastar pikirsaıys týrnıri jáne áleýmettik nysandardy tazalaý men abattandyrýǵa arnalǵan «Áleýmettik sheberhana» aksıasy bar. Sonymen qatar Republic Day atty onlaın chellendj iske qosylyp, belsendi jastar men blogerler ıgi isin aıtyp, qala turǵyndaryn merekemen quttyqtap jatyr.
«Almatylyq eriktiler izgiliktiń – ýaqytsha naýqan emes, ómir salty ekenin kórsetip keledi. «Janashyr júrek» – balalar úılerine, qarttar úıine kómek kórsetetin, ekologıalyq jáne áleýmettik jobalar uıymdastyratyn, az qamtylǵan otbasylarǵa qoldaý bildiretin jastardy biriktiretin dástúrge aınaldy. Biz Almatydan bastaý alǵan meıirim tolqynynyń ózge óńirlerge de shabyt berip jatqanyna qýanyshtymyz», – dedi qalalyq Jastar saıasaty basqarmasynyń basshysy Azız Kajdenbek.
Aldaǵy kúnderi «Janashyr júrek» aksıasy aıasynda ekologıalyq senbilik Eco Day, Qan ortalyǵymen birlese ótetin qan tapsyrý aksıasy, sondaı-aq elimizdiń tanymal tulǵalary týraly beınerolıkter toptamasyn qamtıtyn «Elge qyzmet» jobasy júzege aspaq. Buǵan qosa, balalar úıi tárbıelenýshileri arasynda spartakıada jáne patrıottyq baǵyttaǵy zıatkerlik oıyn Almaly Night uıymdastyrylady. Barlyq is-shara almatylyq jastardyń azamattyq belsendiligin arttyrýǵa, meıirimdilik mádenıeti men áleýmettik jaýapkershilikti qalyptastyrýǵa baǵyttalǵan.
«Respýblıka kúnine arnalǵan «Janashyr júrek» aksıasy jastardyń qoǵamdyq belsendiligin arttyrýǵa jáne eriktilik mádenıetin damytýǵa baǵyttalǵan keshendi bastamalardyń biri. Respýblıka kúni – táýelsiz elimizdiń berik irgetasyn qalaǵan ulyq mereke. Aıtýly merekege oraı qolǵa alynǵan ıgi ister jastardyń patrıottyq rýhyn kúsheıtip, el damýyna úles qosýǵa yntalandyrady. Biz almatylyq eriktilerdiń belsendiligin, qoǵam ıgiligi úshin jasap jatqan naqty isterin joǵary baǵalaımyz», – dedi «QAMQOR CHARITY» qoǵamdyq qorynyń tóraıymy Baǵdat Anarbaeva.