Almatylyq «Qaırat» pen kıprlik «Pafos» arasyndaǵy mach aldynda Ortalyq stadıonǵa jankúıerler jınaldy. Oıyn aldyndaǵy atmosfera qandaı? Aqshamnews.kz tilshisi oqıǵa ornynan eksklúzıv fotolar usynady.
«Qaıratqa» senim artqan jankúıerler
Oıynǵa birneshe saǵat qalsa da, Ortalyq stadıon mańynda jankúıerlerdiń qarasy qalyń. Jastar da, orta jastaǵylar da, tipti balalarymen kelgen otbasylar da kóp. Barlyǵynyń júzinen qýanysh, qobaljý men maqtanysh sezimi baıqalady. Jankúıerler qoldaryna týlaryn, sharftaryn ustap, urandap, án aıtyp, klýbqa degen shynaıy qoldaýlaryn bildirip jatyr.
Almasbek Batyrdyń erekshe kóligi kózge tústi
Jankúıerler arasynda Almasbek esimdi jankúıer óziniń arnaıy bezendirilgen kóligimen kelgen. Bul kólik – kádimgi kólik emes, «Qaırattyń» qozǵalmaly kórmesi dersiń.
Kólik syrtyna klýbtyń logotıpi salynyp, sary-qara boıaýlarmen kómkerilgen.
Fýtbol – otbasylyq merekege aınaldy
Oıyn aldyndaǵy eń áserli kórinisterdiń biri – balalarymen kelgen jankúıerler. Kóptegen otbasylar bul machty asyǵa kútip, arnaıy daıyndalyp kelgen.
Ákesi men uly birdeı fýtbolkalar kıip, anasy men qyzy jalaýsha ustap, fotoǵa túsip júr.
Klýb atrıbýtıkasyna suranys joǵary
Stadıon syrtynda birneshe shaǵyn saýda oryndary ornalasqan. Munda klýb jeıdeleri, sharftary, jalaýshalar men qalpaqtar satylyp jatyr.
Jankúıerler súıikti komandalarynyń sımvolıkasyn keýdelerine taǵyp, stadıonǵa erekshe daıyndyqpen kirmek.
Oıyn bastalmaı jatyp-aq atmosfera qyza tústi. Almatydaǵy Ortalyq stadıon mańynda shynaıy fýtbol meıramy ótip jatyr dese de bolady. Jankúıerler tek jeńis úshin emes, "Qaıratqa" rýh berý úshin jınalǵan. Al biz machtyń ózinen de, nátıjesinen de úmit kútemiz.