Madrıdtik «Realdyń» bas bapkeri Habı Alonso Almatyda ótken UEFA Chempıondar lıgasynyń tarıhı kezdesýinen keıin áserin bólisti, dep habarlaıdy Aqshamnews.kz tilshisi Vesti.kz-ke silteme jasap. Ispanıalyq klýb jergilikti «Qaıratty» 5:0 esebimen utqan bolatyn.
"Qaırat" bizdi tańǵaldyrdy"
Alonso machtan keıingi baspasóz máslıhatynda almatylyq klýbtyń oıynyna baǵa berdi.
“Qaırat” Chempıondar lıgasynda oınaýǵa tolyq laıyq. Biz Almatyǵa kelgende bul komandanyń áleýetin kórdik. Bizdi jyly qabyldady, munda erekshe atmosfera bar. "Qaırat” oıyndy óte belsendi bastady. Alǵashqy mınýttarda bizge sál qolaısyz boldy. Sodan keıin ǵana kombınasıa quryp, olardyń presıńinen shyǵýǵa tyrystyq. Buǵan Arda Gúler kóp kómektesti. “Qaırattyń” belsendiligi bizdi tańǵaldyrdy", - dedi Habı Alonso.
Almatynyń sulýlyǵy bapkerdi tánti etti
Ispanıalyq maman qala kórinisine de baǵa berdi:
"Biz jıi saıahattaımyz, bizdi tańǵaldyrý ońaı emes. Biraq Almatynyń tabıǵaty óte ádemi, ásirese taýlary erekshe áser qaldyrdy. Eger týrıs retinde kelsem, mindetti túrde taýǵa shyǵar edim", - dedi ol.
Mbappe - machtyń juldyzy
Alonso fransýz forvardy Kılıan Mbappeni erekshe maqtap ótti. Aıta keteıik, ol oıynda het-trık jasap, úzdik oıynshy atandy.
"Kılıan ár machta negizgi ról atqarady, ásirese qaqpa aldynda óte qaýipti soqqylar jasaıdy. Onyń birinshi goly keremet boldy. Maǵan onyń formasy unaıdy, ol bıylǵy maýsymda fantasıkalyq oıyn kórsetip júr", - dedi bapker.
Aıyp doby VAR sheshimimen joıyldy
Aıta keteıik, oıynnyń 68-mınýtynda «Qaırat» bir gol soǵýǵa múmkindik alǵandaı edi. Arbıtr bastapqyda penaltı belgiledi, biraq vıdeony qaıta qaraýdan soń sheshimin ózgertti.