2027 jyly qazaq halqy úshin asa mańyzdy tarıhı oqıǵanyń – Bulanty–Bileýti shaıqasynyń 300 jyldyǵy atap ótiledi. Májilis depýtaty Erbolat Satybaldy osy aıtýly data aıasynda mereıtoıdy respýblıkalyq deńgeıde atap ótýge baılanysty Mádenıet jáne aqparat mınıstri Aıda Balaevaǵa depýtattyq saýal joldady, - dep habarlaıdy Aqshamnews.kz tilshisi.
Qazaq halqynyń jońǵar shapqynshylyǵyna qarsy kúresindegi sheshýshi kezeń – Bulanty shaıqasy el tarıhynda altyn árippen jazylǵan.
"1727 jyly Bulanty men Bileýti ózenderiniń arasynda bolǵan bul shaıqas qazaq sarbazdarynyń uıymshyldyǵy men erliginiń úlgisi retinde ulttyq jadymyzda saqtalyp keledi. Bul uly jeńis Ábilqaıyr han bastaǵan birikken qazaq qolynyń jaýǵa kúırete soqqy berýi nátıjesinde júzege asty", - dedi ol.
Májilis depýtaty Erbolat Satybaldynyń aıtýynsha, tarıhı mańyzy zor osy jeńistiń 300 jyldyǵyn laıyqty deńgeıde atap ótý – urpaqqa taǵylym, eldikke qyzmet. Onyń depýtattyq saýalynda úsh naqty usynys bar:
-
Bulanty–Bileýti shaıqasynyń 300 jyldyǵyna arnalǵan respýblıkalyq is-sharalar josparyn ázirleý;
-
Ǵylymı-zertteý, arheologıalyq jáne derektanýlyq jobalardy, sondaı-aq derekti fılmder men oqý quraldaryn daıyndaýdy memlekettik qoldaý;
-
Ulytaýdaǵy Bulanty batyrlar stellasyn abattandyrý jáne týrızm ınfraqurylymyn damytý.
"Qazaq handyǵynyń 550 jyldyq mereıtoıy qarsańynda el men jerdiń taǵdyry synǵa túsken Ulytaý óńirindegi "Bulanty shaıqasy" stellasy ashylǵan bolatyn. Ol jerge osy shaıqasqa qatysqan Bógembaı, Qabanbaı batyrlardan bastap kóptegen qulpy tastar qoıylyp, el jınalyp úlken as berilgen", - dedi ol.
.