Tazalyq pen tartymdylyq egiz uǵym. Tazalyq bar jerde adam kózine jaǵatyn tartymdylyq ta bolady. Al Almaty syndy alyp megapolıste kúndelikti tazalaý jumystaryn júrgizý tipti mańyzdy. Qalamyzǵa óz jumysymen kórik berip, qysta qardan, jazda qoqystan tazartyp júrgen jaýapty merdiger uıymdardyń biri – «Altyn tazalyq» JSHS.
2023 jyldyń qańtarynda qurylǵan kompanıa jas bolsa da, bas bolyp, ózine tapsyrylǵan jumystardy jaýapkershilikpen atqaryp otyr. Merdiger kompanıa 350 myńnan astam adam turatyn Alataý aýdanynda magıstraldyq kóshelerdi, kólik aıryqtary men shaǵynaýdandardy keshendi sanıtarlyq tazalaýmen aınalysady. Kompanıa dırektory Qaırat Jumyrbaevtyń aıtýynsha, «Altyn tazalyq» qaramaǵynda búgingi kúni 50 arnaıy tehnıka bar. Sondaı-aq, mashına júrgizýshilerin men ózge qyzmetkerlerdi qospaǵanda aýdan tazalyǵyn qamtamasyz etetin 130 jumysshy jumys isteıdi.
– Ótken jyly bizge tapsyrylǵan barlyq jumystardy joǵary deńgeıde oryndadyq. Kúndelikti mindetimizge – magıstraldyq jáne aýdan kóshelerin kútip ustaý jumystary kiredi. Naqty aıtqanda, jazǵy ýaqytta: kóshelerdi jýý, olardy tazalyqta ustaý, kógaldaǵy shópterdi kesý, trotýarlardy sanıtarlyq tazalaý jáne t.b. Al qysqy ýaqytta aıtylǵan mindetterge kóshelerdi qardan tazalaý jáne ony shyǵarý, sondaı-aq kóktaıǵaqqa qarsy materıaldardy sebý jumystary qosylady. Bıyl mindetterimiz artyp, gabıon (ózen jaǵalaýynda tas ústinen qoıylǵan tor) arnalaryn jáne jerasty ótkelderin kútip ustaý úshin jaýapkershilik aldyq, – dedi «Altyn tazalyq» JSHS-ynyń dırektory Qaırat Jumyrbaev.
- Kompanıa derekterine sáıkes, «Altyn tazalyq» qyzmetkerleri 2023 jyldyń jazǵy maýsymynda uzyndyǵy – 528 132 m, al aýdany – 4 185 133 m² bolatyn aımaqty tazalaǵan. Al qysqy kezeńde barlyǵy 323 reıs jasap, 5168 m³ qardy qala syrtyna shyǵarǵan. Oǵan qosa, merdiger uıymnyń arnaıy tehnıkalary 7 myń tonnaǵa jýyq kóktaıǵaqqa qarsy materıal paıdalanǵan. Barlyǵy Alataý aýdanynda 11 magıstraldyq dańǵyldyń, 9 aýdandyq mańyzy bar jáne 354 jergilikti kósheniń tazalyǵy men tartymdylyǵy úshin «Altyn tazalyq» qyzmetkerleri jumys istegen.
– Jumysymyzdyń ereksheligine qaraı biz óz aýmaǵymyzdy táýlik boıy baqylap, kezekshilikte bolamyz. Tótenshe jaǵdaı kez kelgen ýaqytta oryn alýy múmkin. Sondyqtan túnde eki brıgadamyz daıyn otyrady. Qysta qar qalyń jaýǵan kúnderi jumysshylarymyzdyń osynda qonyp qalǵan kúnderi de boldy. Biz olarǵa arnaıy jatyn oryn daıyndap, as-aýqatpen qamtamasyz ettik. Al kúndelikti 100-den astam qyzmetkerimiz ózine tapsyrylǵan aýmaqty tazalaýǵa shyǵady. Bıyl jumysshylar sany 15%-ǵa kóbeıdi, – dedi Qaırat Ermekqalıuly.
Aıta ketken jón, merdiger uıym Alataý aýdany ákiminiń tikeleı baqylaýynda Kóriktendirý bóliminiń mamandarymen árdaıym baılanysta jumys isteıdi. Ózara birikken jumys aýdan tazalyǵyn qamtamasyz etýge múmkindik beredi.
Adal iske aıyp salý durys pa?
Almatylyqtardyń qolaılyǵy men tazalyǵy úshin qyzmet atqaratyn jas uıymnyń alǵashqy jyly aldynan shyqqan qıyndyqtary da joq emes. Onyń eń úlkeni – aıyppul. Biraq ózgelerge sekildi tártip buzǵany úshin emes, búginge deıin «Altyn tazalyq» JSHS-yna tikeleı óz mindetin atqarǵany úshin aıyppul salynyp keledi. Atap aıtqanda, kompanıanyń arnaıy tehnıkalary kósheniń trotýarmen teńesetin shetin tazalaýy úshin avtobýs jolaǵymen júrgende, ornatylǵan kameralar merdiger uıymnyń mashınalaryna orynsyz aıyppul jazyp jiberedi eken. Bul máselemen jas kompanıa ártúrli jaýapty Basqarmalar men Polısıa departamentine júginse de, aıtylǵan suraq óz sheshimin tappaı keledi. Aldaǵy ýaqytta adal iske salynǵan aıyp alynyp, kompanıa kólikteri esh qıyndyqsyz óz jumysyn jalǵastyra beredi dep senemiz.
Al «Altyn tazalyq» kompanıasynyń basshysy Qaırat Jumyrbaev qala turǵyndary men qonaqtaryn súıikti qalamyz – Almatyny aıalap, tazalyqta ustaýǵa shaqyrdy.
– Keı azamattar kólikterin ruqsat etilmegen kóshe shetine tastap ketedi. Onyń kesiri bizdiń jumysymyzǵa tıedi. Tehnıkamyz ózine júktelgen aımaqty tazalaı almaı, jumysy baıalaýlaıdy. Bul másele, ásirese, kósheleri tar shaǵynaýdandarda qatty seziledi. Sondaı-aq, turǵyndar turmystyq qatty qaldyqtardy ruqsat etilmegen jerge tastaı salady. Ol jerde qoqys jınala berip, erteń ózimizdiń qalamyzǵa zıan keledi. Sondyqtan almatylyqtardy, onyń ishinde Alataý aýdanynyń turǵyndaryn azamattyq jaýapkershilik tanytyp, qorshaǵan ortamyzdy taza ustaýǵa shaqyramyn. Mádenıet tazalyqtan bastalady. Kishkentaı kezinen balalarymyzdyń arasynda osyndaı tazalyqtyń mádenıetin birge qalyptastyraıyq, – dedi «Altyn tazalyq» basshysy.
Jeńis Mamytov, jumysshy:
- Bul kompanıada jumys istegenime 1 jyl boldy. Meniń jumys kólikterin jóndeýmen aınalysamyn. Bul jaýapty jumys. Óıtkeni kólik jol ústinde buzylyp qalsa, barlyǵy toqtap qalady.
Kóbegen Kókeıev, jumysshy:
- Jas 68-de. Ómir qozǵalys degendeı, bul jumyspen biz de bir orynda turmaımyz. Kúndelikti qalamyzdy kórkeıtip, tazalyǵyn saqtaýǵa óz úlesimizdi qosamyz. Jumys istep, qozǵalysta bolý óz densaýlyǵym da jaqsy. Jumys barysynda jańbyrǵa da, sýyq pen qarǵa da qaramaı jumys isteıtin kúnderimiz bolady.
