Jaryssóz 14 naýryzda Astana qalasynyń №2 Saryarqa sotynda bolýy tıis edi
Sot qosymsha ýaqyt berýdi suraǵan memlekettik aıyptaýshy taraptyń ótinishin qanaǵattandyryp, kásipker Qaırat Boranbaevtyń isi boıynsha ótýi tıis jaryssóz keıinge qaldyryldy, dep habarlaıdy Almaty-akshamy.kz.
Kásipker Qaırat Boranbaevtyń isi boıynsha taraptardyń jaryssózi 14 naýryzda Astana qalasynyń №2 Saryarqa sotynda bolýy tıis edi. Alaıda, memlekettik aıyptaýshy-prokýror Baýyrjan Shekenov ózine qosymsha ýaqyt berý týraly sotqa ótinish túsirip, is boıynsha jaǵdaı ózgergenin málimdedi.
"QR QİJK-niń 340-baby, 5-bólimine sáıkes, eger basty sot talqylaýy barysynda sottalýshyǵa neǵurlym aýyr aıyp taǵý nemese bastapqy aıyptan basqa aıyp taǵý qajettiligi týyndasa, sot isti qaraýdy keıinge qaldyrady jáne prokýrorǵa jańa aıyptaý aktisin jasaý úshin qajetti ýaqyt beredi. Osyǵan baılanysty aıyptaýshy tarap jańa aıyptaý aktisin toltyrý úshin ýaqyt berýdi surap, ótinish bildiredi, óıtkeni qylmystyq is boıynsha mán-jaılar ózgeredi jáne bul jańa aktide kórsetýdi talap etedi", - dedi prokýror Baýyrjan Shekenov.
№2 Saryarqa sotynyń sýdıasy Nazgúl Bapaqova aıyptaýshy taraptyń ótinishin qanaǵattandyrý týraly sheshim shyǵardy. Sot otyrysyna 17 naýryzǵa deıin úzilis jarıalandy, dep jazdy Zakon.kz.
Qaırat Boranbaev pen "Azıa Gazchýndja" JSHS-niń negizin qalaýshy ekinshi adam Roman Nahanovqa ózderine senip tapsyrylǵan bóten múlikti jymqyrý jáne jylystatý, zańsyz aqshany jáne múlikti zańdastyrý, qylmystarǵa járdem kórsetý túrinde aıyp taǵyldy.
Atalǵan is boıynsha sot prosesi Astanada 2022 jyly 30 jeltoqsanda bastaldy.