Kembrıdj jáne Oksford ýnıversıtetteriniń psıhologtary, nevrologtary men basqa da mamandary 10-21 jas aralyǵyndaǵy 17 myńnan astam (bala, jasóspirim jáne jas) adamdyń deregin negizge ala otyryp, taldaý jasaǵan.
Bul ǵalymdardy Nature Communications jýrnalynda jarıalanǵan maqaladaǵy jasóspirimderdiń áleýmettik jelini paıdalaný deńgeıi men óz ómirine qanaǵattaný dárejesi arasyndaǵy tikeleı baılanys qyzyqtyrǵan.
Zertteý nátıjesinde, mamandar jasóspirimderdiń áleýmettik jelilerdiń jaǵymsyz aspektilerine ásirese sezimtal bolatyn jasyn anyqtady. Osy kezeńderde jasóspirim áleýmettik jelide kóbirek ýaqytyn ótkizse, bir jyldan keıin onyń óz ómirine kóńili tolmaıtyn bolady. Al, kerisinshe, bala osy jasynda áleýmettik jelini neǵurlym azyraq paıdalansa, onyń óz ómirine degen bir jyldan keıingi kózqarasy durys bolady.
Ǵalymdar qyzdar úshin bul qaýipti kezeń 11 jastan 13 jasqa deıin, al uldar úshin 14 jastan 15 jasqa deıin degen tujyrymǵa keldi. Mamandar bul aıyrmashylyq ár túrli jynys ókilderiniń mı qurylymdarynyń damýymen, sondaı-aq uldardyń qyzdarǵa qaraǵanda jynystyq jaǵynan kesh jetilýimen baılanysty bolýy múmkin dep boljaıdy.
Zertteýshiler buǵan qosa áleýmettik jelilerdi paıdalanýdyń taǵy bir qaýipti kezeńin anyqtady, bul qyzdarǵa da, uldarǵa da birdeı – 19 jas. Bul kezeńdegi jastyń ómirinde bolatyn – óz betinshe ómir súre bastaý, stýdenttik shaq nemese jumys isteý sıaqty ózgeristerge baılanysty áleýmettik jelilerge ásirese sezimtal bolady eken.