№7 Almaty qalalyq klınıkalyq aýrýhanasynyń 64 jastaǵy pasıenti keıingi birneshe jylda epıgastrıa, tamaqty sińirý prosesiniń buzylýy, jıi júrek aıný, qusý, ish qatý, salmaq joǵaltý aýrýlarynan zardap shekken.
Naýqastyń jaǵdaıy «qabynǵan shemen» – kindigi syrtqa shyǵyp turǵan úlken kólemdi ish. Er adamǵa tipti jatý qıyn bolǵan. Sebebi, jatqan kezde júrek-ókpe jetispeýshiligi údeı túsedi.
Oǵan №7 qalalyq aýrýhana mamandary «uıqy beziniń jalǵan jylaýyǵy» dıagnozyn qoıdy. Sóıtip MÁMS sheńberinde «Emdeýge jatqyzý búrosy» portaly boıynsha josparly operasıalyq emdeýge jiberildi, dep habarlaıdy Almaty-akshamy.kz.
Uıqy beziniń jalǵan jylaýyǵy – bul suıyqtyqtyń shekteýli jınalýy, onda pankreatıkalyq fermentterdiń, qannyń edáýir kóp mólsheri bar, sondaı-aq nekrozdyq (ólgen) tinder bolýy múmkin. Uıqy beziniń jalǵan jylaýyǵynyń paıda bolý sebebi – ótkerilgen pankreatıt nemese pankreonekroz, ol ót-tas aýrýy, asqazan-ishek joldarynyń oıyq jara aýrýy, alkogóldi qabyldaý, durys tamaqtanbaý, ish jaraqaty aıasynda damıdy. Uıqy beziniń jalǵan jylaýyǵynyń belgileri onyń kólemi ulǵaıǵan kezde asqynady.
Pasıentke ota jasaǵan kóp jyldyq tájirıbesi bar hırýrg Manas Ramazanov
bundaı naýqastarǵa otaǵa tyńǵylyqty daıyndyqty qajet etetinin atap ótti. Óıtkeni olar tamaqtanýdyń buzylýyna jáne taǵamnyń qorytylýyna baılanysty aqýyzdyq energıa jetispeýshiligin damytady.
«Aldyn ala daıyndyqtan keıin pasıent otaǵa alyndy. Kúrdeli 4 saǵattyq operasıa jasaldy. Biz jylaýyq qýysyn asqazanǵa jalǵadyq. Uıqy beziniń jalǵan jylaýyǵynyń kezinde jylaýyqty dástúrli alyp tastaýmen joıýǵa bolmaıdy, óıtkeni jylaýyq uıqy bezimen qosylǵan jáne únemi fermentter bóledi. Bul jaǵdaıda biz jylaýyqty asqazannyń artqy qabyrǵasymen baılanystyrdyq, osylaısha jylaýyqta suıyqtyq jınalmaı asqazan-ishek jolyna túsýine múmkindik berdik. Sonymen qatar, uıqy beziniń jalǵan jylaýyǵyna baılanysty naýqasta operasıa kezinde qosymsha qıyndyqtar týdyratyn qabynǵan shemen bar. Barlyq tehnıkalyq qıyndyqtarǵa jáne ózindik ereksheligine qaramastan, ota jospar boıynsha tıisti deńgeıde oryndaldy», – deıdi profesor Ramazanov.