Almatyda jyljymaly ekologıalyq zerthanalardy paıdalana otyryp, avtomobılderdi tekserý boıynsha reıdter jalǵasyp keledi, - dep habarlaıdy Aqshamnews.kz.
Bul týraly Ekologıa basqarmasynyń ókilderi habarlady.
Mundaı tekseristi Almaty qalasy ákimdigi bekitken is-sharalar josparyna sáıkes turaqty ekologıalyq monıtorıń aıasynda “Eco Almaty” JSHS jol polısıasy qyzmetkerlerimen birge júrgizedi. Olar aýanyń lastanýyn azaıtýǵa, paıdalanylǵan gazdardyń ýlylyǵyn baǵalaýǵa, kólikter arasyndaǵy ekologıalyq buzýshylyqtardy anyqtaýǵa baǵyttalǵan.
Máselen, 2025 jyly 4-10 qazan aralyǵynda mamandar 224 kólikti tekserdi. Onyń 138-i benzınmen nemese gazben júrse, 23-iniń zıandy zattardyń ruqsat etilgen mólsherinen asyp ketkeni, 64 dızeldi kólikterdiń jartysyna jýyǵy (26) ýyttylyq pen tútin shyǵarý normalarynan asyp ketken.
Turaqty tekserýler lastaný kózderin ýaqytyly anyqtaýǵa jáne olardy joıý boıynsha sharalar qabyldaýǵa kómektesedi. Bul qaladaǵy aýa sapasyn jaqsartýǵa yqpal etedi, dep atap ótti Almatynyń ekologıa basqarmasy.
Eske salsaq, Almatyda «Atmosferalyq aýany qorǵaý salasynda arnaıy ekologıalyq talaptardy engizý týraly» atmosferalyq aýany qorǵaý qaǵıdalarynyń jobasy ázirlengen bolatyn. Erejeniń negizgi maqsaty – megapolıs atmosferasynyń lastaný deńgeıin júıeli túrde tómendetý. Ekologıa basqarmasynyń derekterine sáıkes, qaladaǵy barlyq shyǵaryndynyń 60%-y avtokólikten, qalǵany jeke turǵyn úı sektoryna jáne stasıonarlyq lastaný kózderinen (óndiris oryndary, monshalar, qoǵamdyq tamaqtaný, qurylys nysandary) shyǵady.
Erejeni júzege asyrý ekologıalyq jaǵdaıdy jaqsartýǵa, ásirese qysqy kezeńde almatylyqtardyń ómir súrýine jaıly jaǵdaı jasaýǵa múmkindik beredi.