Bul suraqty kópshilik jıi qoıady, ásirese sońǵy ýaqytta jelide taraǵan jazbalar men aqparattardan keıin. Ásirese, bireýdiń qaryzy úshin ózińizdiń nemese týysyńyzdyń úıine arest qoıylatynyn estigender úshin bul másele mańyzdy bolyp otyr, dep habarlaıdy aqshamnews.kz
Taıaýda Maqsut Tańjaryqulynyń áleýmettik jelide jarıalaǵan jazbasy qoǵamda úlken talqyǵa tústi. Ol óziniń úıinde «propıskada» turǵan adam qaryzyn ótemese, úıine arest qoıylatynyn aıtady. Mundaı sózder, árıne, úreı týǵyzady. Alaıda, bul aqparat shyndyqqa janaspaıdy.
Ulttyq kolektorlar palatasynyń burynǵy tóraǵasy, qazirgi QR Mıkroqarjy ombýdsmany Nazgúl Esteýsizova bul jaǵdaıdy tolyq teriske shyǵarady. Onyń aıtýynsha, «sot oryndaýshy» retinde habarlasqan adam zańdy áreket jasamaıdy. Atap aıtqanda, bul jaǵdaıda sot oryndaýshysy emes, kolektorlyq kompanıanyń ókili bolýy múmkin, óıtkeni qaryzdy óndirip alý boıynsha olar keıde qaryz alýshylardy qorqytyp-úrkitýge tyrysady.
Nazgúl Esteýsizova zańdy turǵydan túsinik berip, úıińizde tirkeýde turǵan adamnyń qaryzy úshin baspanany arestke qoıý múmkin emes ekenin aıtady. Sondyqtan, eger sizge qaryz týraly osyndaı qorqytý habarlamalary kelse, bul zańbuzýshylyqqa jatady. Mundaı jaǵdaıda sóılesýdiń dálelin saqtaý úshin áńgimelerdi aýdıo nemese vıdeo arqyly tirkep, Qarjy naryǵyn retteý jáne damytý agenttigine shaǵymdanýǵa bolady. Bul agenttik tekseris júrgizip, eger zańbuzýshylyq anyqtalsa, tıisti aıyppul sala alady.
Boryshkerdiń qaryzy tek sot sheshimimen ǵana múlkimen óteletinin umytpańyz. Eger sottyń úkimi bolsa, boryshkerdiń qaryzy óz múlkimen qaıtarylýy múmkin. Alaıda bul jaǵdaıda da arestti tek sot oryndaýshysy ǵana qoıýy múmkin.
Úıdiń arestte turǵanyn tekserý úshin Ádilet mınıstrliginiń arnaıy portaly bar, onda Atqarýshylyq is júrgizý organdarynyń avtomattandyrylǵan aqparattyq júıesi arqyly tekserýge bolady.
Eger sizge uqsas jaǵdaı oryn alsa, qoryqpaı, zańdy túrde áreket etińiz jáne zańsyz áreketterge jol bermeńiz!