Referendýmǵa daıyndyqtyń alǵashqy kúnderinen bastap prokýratýra organdary qoǵamdyq pikirdi suraý talaptaryn buzý faktilerin tirkegen.
Bas prokýratýranyń málimetine súıensek, búgingi tańda respýblıkalyq referendýmǵa qatysty zańsyz qoǵamdyq pikir suraýdyń 8 faktisi anyqtalǵan.
«Alty jaǵdaıda mundaı saýalnamalardy jeke tulǵalar, al eki jaǵdaıda zańdy tulǵalar Ortalyq referendým komısıasyn aldyn ala eskertpesten júrgizgen. Atalǵan faktiler boıynsha prokýratýra organdary tórt azamat pen eki zańdy tulǵany Qazaqstan Respýblıkasynyń Ákimshilik quqyq buzýshylyq týraly kodeksiniń 120-babynyń 3-bóligine sáıkes jaýapqa tartty, olarǵa aıyppul salyndy. Qalǵandaryna qatysty zańdy jaýapkershilikke tartý boıynsha jumys júrgizilip jatyr», – delingen habarlamada.
Qadaǵalaý organy sondaı-aq azamattar men qoǵamdyq birlestikterdiń referendýmǵa shyǵarylǵan másele boıynsha óz pikirlerin jınalystarda, mıtıńterde, azamattardyń jıyndarynda, buqaralyq aqparat quraldarynda úgit júrgizý kezinde bildirýge quqyly ekenin eskertti (QR Konstıtýsıalyq zańynyń 7-baby, «Respýblıkalyq referendým týraly»).
Jınalystar men mıtıńter Qazaqstan Respýblıkasyndaǵy beıbit jınalystardy uıymdastyrý jáne ótkizý tártibi týraly zań sheńberinde uıymdastyrylyp, ótkizilýi kerek.
Beıbit jınalystardy ótkizý talaptaryn saqtamaý Qazaqstan Respýblıkasynyń Ákimshilik quqyq buzýshylyq týraly kodeksiniń 488-baby boıynsha ákimshilik jaýapkershilikke ákeledi.
«Úgit-nasıhat kezeńi 2024 jylǵy 3 qyrkúıekte bastalyp, 4 qazanǵa deıin (saǵat 24:00-ge deıin) jalǵasady. Al referendým aldyndaǵy jáne referendým kúni, ıaǵnı 5 jáne 6 qazanda úgit-nasıhatqa tyıym salynady. Konstıtýsıalyq zańǵa sáıkes (QR «Respýblıkalyq referendým týraly» Konstıtýsıalyq zańynyń 7-babynyń 2, 3, 4-tarmaqtary) barlyq úgittik baspa materıaldarynda olardy shyǵarǵan uıym, basylǵan jeri jáne taralymy, sondaı-aq shyǵarýǵa jaýapty adamdar týraly aqparat bolýy kerek. Anonımdik úgit materıaldaryn taratýǵa tyıym salynady. Úgittik materıaldardy eskertkishterge, obelıskterge, tarıhı, mádenı nemese sáýlet qundylyǵy bar ǵımarattar men qurylystarǵa, sondaı-aq daýys berý oryndaryna ilýge bolmaıdy», – dep túsindirdi Bas prokýratýra.