Memleket basshysy Premer-Mınıstrdiń orynbasary Eraly Toǵjanovty qabyldady
Eraly Toǵjanov Qasym-Jomart Toqaevqa jalaqyny kóterý isiniń 1 mıllıonnan astam búdjettik sala qyzmetkerleri men kvazımemlekettik sektordyń óndiristik personalyn qamtıtynyn habarlady. Sondaı-aq kásipkerlikke mindettemeler belgileý arqyly memleketten kómek alatyn iri bıznestegi 2,8 mıllıon qyzmetkerdiń eńbek tabysyn arttyrý qarastyrylǵan, dep habarlaıdy Almaty-akshamy.kz Aqordanyń resmı saıtyna silteme jasap.
Memleket basshysyna kásipkerlik qyzmettiń tabysyn arttyrýǵa, sondaı-aq farmasevtıka, bıotehnologıa, IT-tehnologıa jáne munaı-hımıa baǵytyndaǵy jańa óndirister sıaqty ekonomıkanyń túrli salalaryndaǵy ınvestısıalyq jobalardy iske asyrý arqyly jańa jumys oryndaryn ashýǵa qatysty Úkimettiń jospary baıandaldy.
Sonymen qatar Premer-Mınıstrdiń orynbasarynyń aıtýynsha, halyqtyń áleýmettik jaǵdaıy tómen toptaryn qoldaý sharalary qarastyrylǵan. Mysaly, «Baqytty otbasy» jobasy aıasynda kóp balaly jáne múmkindigi shekteýli balalardy tárbıelep otyrǵan 20 myń áıel jumyspen qamtylady. Jastardy jumysqa ornalastyrý úshin «Jastar tájirıbesi» jáne «Alǵashqy jumys orny» jobalary júzege asyrylyp, 400 aılyq eseptik kórsetkishke deıin granttar beriledi.
Kezdesý sońynda Prezıdent halyqtyń tabysyn arttyrýdyń aıryqsha mańyzdy ekenin atap ótip, Úkimetke bul máseleni erekshe baqylaýda ustaýdy tapsyrdy.