Qasym-Jomart Toqaev Terı Hakalany Eýropalyq Odaqtyń Ortalyq Azıa boıynsha arnaýly ókili laýazymyna taǵaıyndalýymen quttyqtap, qyzmetine tabys tiledi.
Terı Hakala Qasym-Jomart Toqaevqa Eýropalyq Keńestiń Prezıdenti Sharl Mısheldiń sálemin jetkizdi. Onda Keńes basshysynyń Qazaqstan Prezıdentin osy jyldyń sońyna deıin Brússelge shaqyratyny aıtylǵan, dep habarlaıdy Almaty-akshamy.kz Akorda.kz saıtyna silteme jasap.
Memleket basshysy Qazaqstannyń Eýropalyq Odaqpen ózara strategıalyq is-qımylyna oń baǵa berdi. 2020 jyldyń naýryz aıynda kúshine engen Keńeıtilgen áriptestik jáne yntymaqtastyq jónindegi kelisim osy qatynastarǵa tyń serpin berdi.
«Biz Eýropalyq Odaqpen qarqyndy saýda-ekonomıkalyq jáne ınvestısıalyq baılanystardy joǵary baǵalaımyz. Qazaqstan – Eýropalyq Odaqtyń Ortalyq Azıadaǵy basty saýda seriktesi. 2020 jyldyń qorytyndysy boıynsha ekijaqty saýda aınalymy 24 mıllıard dollarǵa jýyqtady», – dedi Qazaqstan Prezıdenti.
Memleket basshysy men Eýropalyq Odaqtyń arnaýly ókili daǵdarystan keıingi kezeńde ózara is-qımyldyń baǵyttary ishinde jańartylatyn energetıka, joǵary tehnologıalar, ınfraqurylym men densaýlyq saqtaý salalaryna erekshe basymdyq beriletinin atap ótti.
Halyqaralyq kún tártibin talqylaý barysynda Aýǵanstandaǵy jaǵdaıǵa erekshe mán berildi.
Qasym-Jomart Toqaev Aýǵanstanda kúrt ózgergen áskerı-saıası jaǵdaıǵa baılanysty týyndap otyrǵan syn-qaterlerge alańdaýshylyq bildirdi. Prezıdenttiń aıtýynsha, bul jaǵdaıdyń bar aýyrtpalyǵy qaqtyǵys aımaǵyna jaqyn ornalasqan Ortalyq Azıa memleketterine sezilip otyr.
Taraptar Aýǵanstannyń barlyq aýmaǵynda jýyq arada jaǵdaıdyń turaqtalyp, qoǵamdyq tártiptiń ornyǵýyna, adam quqyqtary men erkindiginiń saqtalýyna jáne Kabýldyń halyqaralyq áýejaıynan adamdardy kedergisiz kóshirýge qatysty pikirlerin bildirdi.
Qazaqstan Prezıdenti men Arnaýly ókil Ortalyq Azıa elderi men Eýropalyq Odaq arasyndaǵy qarym-qatynasta atalǵan máseleniń mańyzyn eskere otyryp, baılanystardy qoldaýǵa daıyn ekenderin naqtylady.