Prezıdent Ulttyq qaýipsizdik komıtetiniń tóraǵasy Ermek Saǵymbaevty qabyldady, dep habarlaıdy Almaty-akshamy.kz.
Ulttyq qaýipsizdik komıtetiniń bólimsheleri birqatar lańkestik qylmystyń, sonyń ishinde qoldan jasalǵan jarylǵysh qurylǵyny qoldaný arqyly halyq kóp jınalatyn oryndardyń birinde jasalmaq bolǵan terorıstik aktige tosqaýyl qoıylǵany jóninde baıandady. Berilgen málimet boıynsha 19 adam qamaýǵa alynǵan, - delingen habarlamada.
Terorızmge qarsy ortalyq shtabynyń jumysyn úılestirý kezinde terrorlyq qaterlerge qarsy is-áreket sharalaryn jetildirý úshin jattyǵý jıyndary men daıyndyqtar ótkizilgenin habarlady. Shet memleketterdiń arnaýly qyzmetteriniń barlaý áreketterine qarsy is-qımyl operasıalary júzege asyrylǵan.
Anyqtalǵan birqatar fakti boıynsha sotqa deıingi tergeý amaldary júrgizilip jatyr. Quqyq qorǵaý organdarymen birlese júrgizgen krımınogendik jaǵdaıdy saýyqtyrý jumystarynyń nátıjesi týraly baıandady.
Bıylǵy tórt aıda:
UQK 8 qaýipti uıymdasqan qylmystyq topty quryqtaǵan;
qarý-jaraq pen oq-dári jasaýǵa qatysty 7 jasyryn seh joıylǵan;
zańsyz aınalymnan 268 qarý, 21 granata jáne 30 myńnan astam oq-dári tárkilengen;
16 esirtki laboratorıasynyń, 11 halyqaralyq jáne 17 óńirlik esirtki kanalynyń jumysy toqtatylǵan;
Memlekettik shekarany kúzetý salasynda 6 987 zań buzýshy ustalǵan.
Shamamen 2,8 mıllıard teńge kóleminde valúta, altyn jáne basqa da taýarlardyń zańsyz tasymaldanýyna jol berilmegen. Qarý men oq-dárilerdi tasymaldaýǵa qatysty 85 árekettiń joly kesilgen; zańsyz kóshi-qon boıynsha 4 arnaǵa tosqaýyl qoıylyp, olardyń 6 uıymdastyrýshysy ustalǵan; Ulttyq qaýipsizdik komıtetiniń tehnıkalyq bólimsheleri 37,9 mıllıonnan astam kıbershabýyldy jáne eldiń mańyzdy ınfraqurylym nysandaryna baǵyttalǵan 1948 DDoS-shabýylǵa toıtarys bergen.
Prezıdent Ulttyq qaýipsizdik organdary qyzmetiniń baǵyttary boıynsha birqatar naqty tapsyrma berdi.