Kezdesýde Memleket basshysy Aýǵanstandaǵy ahýalǵa erekshe nazar aýdardy.
Qazaqstan Prezıdenti Qasym-Jomart Toqaev Soltústik Makedonıanyń Syrtqy ister mınıstri Býıar Osmanıdi qabyldady, dep habarlaıdy Almaty-akshamy.kz Akorda.kz silteme jasap. .
Memleket basshysy elimizge resmı saparmen kelgen Soltústik Makedonıanyń Syrtqy ister mınıstri Býıar Osmanıdi qabyldady.
Qasym-Jomart Toqaev Býıar Osmanıge iltıpat bildire otyryp, eki el arasyndaǵy yntymaqtastyqqa tyń serpin berý turǵysynan onyń bul saparynyń mańyzy zor ekenin atap ótti.
«Bizdiń elderimiz ózara is-qımyldardy, atap aıtqanda saýda, ınvestısıa salalaryndaǵy qatynastardy jáne gýmanıtarlyq baılanystardy nyǵaıtý úshin zor múmkindikterge ıe. Sondyqtan memleketterimiz arasyndaǵy yntymaqtastyqty damytý úshin bar áleýetti paıdalaný kerek. Sondaı-aq halyqaralyq uıymdar aıasynda da tyǵyz yqpaldastyq ornatamyz degen úmittemiz», – dedi Qazaqstan Prezıdenti.
Qasym-Jomart Toqaev Tetovo qalasyndaǵy koronavırýspen aýyrǵan naýqastar emdeletin aýrýhanada bolǵan órt saldarynan qaza tapqan adamdardyń otbasylaryna kóńil aıtty.
Kezdesýde Memleket basshysy Aýǵanstandaǵy ahýalǵa erekshe nazar aýdardy.
«Aýǵanstanǵa qatysty ustanymymyz aıqyn. Halyqaralyq qoǵamdastyqtyń osyndaı betburystar kezinde Aýǵanstannan irgesin aýlaq salmaı, atalǵan elge kómek berip, qoldaý kórsetýi qajet dep esepteımiz. Biz Aýǵanstannyń ýaqytsha jańa úkimetin ınklúzıvti, barlyq etnıkalyq toptar men qoǵamdyq-saıası kúshterdiń múddesin qurmetteıdi dep úmittenemiz. Qazirgi Aýǵanstan úkimeti adam quqyqtaryn, áıelder men balalardyń quqyqtaryn qorǵaý jónindegi mindettemelerin oryndap, halyqaralyq qaýymdastyqty jahandyq jáne aımaqtyq qaýipsizdik pen turaqtylyqqa qaýip tóndiretin terorızmniń, zańsyz esirtki aınalymynyń taralýynan jáne basqa da qıyndyqtardan qorǵaý úshin naqty sharalar qabyldaıtynyna úmit artamyz. Sonymen qatar Qazaqstan úkimeti Aýǵanstan úkimetimen konstrýktıvti iskerlik baılanystardy, ásirese saýda jáne gýmanıtarlyq yntymaqtastyq salalaryndaǵy qatynastardy ornatýǵa daıyn. Óıtkeni bul salalar boıynsha eki el arasynda dástúrli tyǵyz baılanys bar», – dedi Prezıdent.
Qasym-Jomart Toqaev Aýǵanstanda turatyn qazaqstandyqtardyń qaýipsizdigin qamtamasyz etýdiń mańyzdy ekenine toqtaldy. Ol Býıar Osmanıge Qazaqstan azamattary men etnıkalyq qazaqtardy óz otanyna qaıtarý jóninde, sondaı-aq álemdik qaýymdastyqtyń halyqaralyq uıymdar qyzmetkerlerin, onyń ishinde BUU-nyń Aýǵanstanǵa kómek berý jónindegi mısıasyn evakýasıalaý jumystaryna kómektesý jóninde qabyldaǵan sharalary týraly aıtty.
Óz kezeginde Býıar Osmanı kezdesýge múmkindik bergeni úshin Memleket basshysyna alǵys aıtyp, eki el táýelsizdiginiń 30 jyldyǵy aıasynda jasaǵan saparynyń sımvoldyq máni bar ekenin atap ótti.
«Meniń Qazaqstanǵa saparym bizdiń memleketter arasyndaǵy qarym-qatynastardy jańa beleske shyǵarady degen senimdemin. Biz ekijaqty baılanystardy tereńdetýge jáne nyǵaıtýǵa múddelimiz», – dedi makedonıalyq dıplomat.
Kezdesýde Aýǵanstan baǵyty boıynsha halyqaralyq ádisterdi jumyldyrýda BUU Qaýipsizdik Keńesiniń basymdyqqa ıe ekeni atap ótildi.
