Memleket basshysy ınvestısıalyq jobalardy júzege asyrýǵa qatysty birqatar tapsyrma berdi.
Memleket basshysyna «QazMunaıGaz» ulttyq kompanıasy janar-jaǵarmaı naryǵyndaǵy jaǵdaıdy turaqtandyrý úshin qabyldap jatqan sharalary týraly esep berildi, dep habarlaıdy Almaty-akshamy.kz Aqordaǵa silteme jasap.
Maǵzum Myrzaǵalıevtiń málimetine sáıkes, bıyl Qazaqstanda 17 mıllıon tonna munaı ónimderi óndiriledi. Bul - buryn bolmaǵan rekordtyq kórsetkish.
Shymkent jáne Atyraý munaı óńdeý zaýyttaryndaǵy josparly jóndeý jumystaryn keıinge shegerý jóninde sheshim qabyldandy. Bul ishki naryqty qosymsha 150 myń tonnaǵa deıin dızel otynymen qamtamasyz etýge múmkindik beredi. Sondaı-aq «Qazaqstan temir joly» ulttyq kompanıasy 100 myń tonnaǵa deıin dızel otynyn ımporttaıdy.
Maǵzum Myrzaǵalıev «QazMunaıGazdyń» munaı-gaz hımıasy salasyndaǵy jobalarynyń júzege asyrylýy jóninde baıandady.
Qazirgi ýaqytta Atyraý oblysyndaǵy polıpropılen óndiretin zaýytty iske qosý jumystary aıaqtaldy. Kásiporyn bir aıdyń ishinde iske qosylady dep josparlanyp otyr.
Budan bólek, Prezıdentke polıetılen jáne býtadıen óndirisine qatysty jobalardyń júzege asyrylý barysy týraly da aıtyldy.
Memleket basshysyna Kaspıı qubyr jelisi konsorsıýmynyń teńiz termınalyndaǵy qazirgi ahýal jóninde málimet berildi. Munaı tankerlerge turaqty túrde quıylyp, kestege sáıkes jóneltilip jatyr.
Kezdesý qorytyndysy boıynsha Memleket basshysy ınvestısıalyq jobalardy júzege asyrýǵa qatysty birqatar tapsyrma berdi.