Aýǵanstannyń halqy jalǵyz qalmaýy tıis.
Qazaqstan Prezıdenti Qasym-Jomart Toqaev Aýǵanstanǵa kómek jetkizý úshin Almatyda gýmanıtarlyq hab uıymdastyrýdy usyndy, dep habarlaıdy Almaty-akshamy.kz Almaty.tv silteme jasap.
«Bul kúnderi búkil álemde jáne Dýshanbede aýǵan máselesi týraly kóp aıtylyp, SHYU alańynda keńes ótkizilip jatyr, eldegi jaǵdaı keshe Ujymdyq qaýipsizdik týraly shart uıymynyń otyrysynda da talqylandy. Qazaqstan bolashaq Aýǵanstandy kórshilerimen tatý ómir súretin shynaıy táýelsiz jáne birtutas memleket retinde kóredi. Osy taǵdyrsheshti tarıhı sátte Aýǵanstannyń kóp ultty halqy buryn-sońdy bolmaǵan qıyndyqtarǵa qaramastan, jalǵyz qalmaýy tıis», – dedi Qazaqstan Prezıdenti Shanhaı yntymaqtastyq uıymy memleket basshylary keńesiniń samıtinde.
Qasym-Jomart Toqaev SHYU Aýǵanstandaǵy beıbitshilik pen kelisimge qol jetkizýde belsendi ról atqara alady jáne atqarýy tıis dep sanaıdy.
«Biz tek ujymdyq kúsh-jigermen ǵana qaýip-qaterlerge qarsy kúreste óńirlik qaýipsizdikti qamtamasyz ete alamyz. Qazaqstan óz tarapynan destrýktıvti ıdeologıanyń, esirtki aǵynyn jáne Aýǵanstannan tys jerlerge baqylaýsyz kóshi-qondy boldyrmaý úshin óńirlik áriptesterimizben ózara is-qımyldy keńeıtip jatyr.Sondaı-aq, Aýǵanstan tap bolǵan ózekti gýmanıtarlyq jáne ekonomıkalyq problemalardy sheshý úshin qoldan kelgenshe kómek kórsetýge daıynbyz. Qazaqstannyń qolda bar ınfraqurylymy men logıstıkalyq múmkindikterin eskere otyryp, Aýǵanstanǵa halyqaralyq kómek jetkizý úshin Almatyda SHYU gýmanıtarlyq habyn uıymdastyrýdy usynamyz. Bul qadam uıymnyń óńirdegi ótkir problemalardy sheshýdegi rólin arttyrýǵa, sondaı-aq BUU men basqa da halyqaralyq qurylymdardyń qyzmetin úılesimdi tolyqtyrýǵa múmkindik beretinine senimdimin», – dedi Toqaev.