İshki naryqty otandyq ónimmen toltyrý
Úkimette QR Premer-Mınıstri Álıhan Smaıylovtyń tóraǵalyǵymen ótken keńeste Memleket basshysynyń 19 sáýirdegi elimizdiń áleýmettik-ekonomıkalyq damý máseleleri jóninde keńeıtilgen keńeste bergen tapsyrmalaryn júzege asyrý sharalary qaraldy, dep habarlaıdy Almaty-akshamy.kz Úkimet saıtyna silteme jasap.
Ulttyq ekonomıka mınıstri Álibek Qýantyrov JİÓ ósimin 6% deńgeıinde qamtamasyz etý maqsatynda ekonomıka salalarynda ósýdiń qosymsha kózderi pysyqtalatynyn baıandady. Atap aıtqanda, taý-ken óndirý sektoryn damytýǵa, onyń ishinde iri munaı-gaz jobalaryn, óńdeý ónerkásibin, AÓK, SHOB jáne qyzmet kórsetý sektoryn jandandyrýǵa basa nazar aýdarylatyn bolady.
Makroekonomıkalyq saıasattyń teńgerimdiligin jaqsartý maqsatynda búdjet tapshylyǵyn azaıtý, memlekettik qaryzdy turaqtandyrý jáne Ulttyq qordan túsetin transfertterdi qysqartý boıynsha sharalar qabyldanady. Búdjettiń teńgerimdiligi munaıǵa qatysty emes túsimderdi ulǵaıtý esebinen, onyń ishinde tıimsiz salyqtyq jeńildikterdi alyp tastaý esebinen qamtamasyz etiledi.
Inflásıany tómendetý maqsatynda Ulttyq bankpen birlesip ózektendirilgen tıisti Keshendi jospardy iske asyrý jalǵasady. İshki naryqty otandyq ónimmen toltyrý arqyly azyq-túlik ónimderiniń baǵasyn turaqtandyrýǵa basty nazar aýdarylatyn bolady.
Jańa Salyq kodeksi sheńberinde qosylǵan quny joǵary ónim óndirýge ınvestısıalar tartýǵa jáne tehnologıalyq eksportty yntalandyrý úshin salyq jeńildikterin qaıta baǵdarlaý, sondaı-aq jumys oryndaryn ashý, qaıta óńdeý nysandaryn salý, áleýmettik mindettemelerdi oryndaý esebinen qatty paıdaly qazbalardy óndirý boıynsha rentabeldiligi tómen jańa jobalarǵa salyq júktemesin azaıtý máseleleri pysyqtalýda.