Qazir zaýyt ishki naryqtyń 40 paıyzyn qamtamasyz etip otyr
Qasym-Jomart Toqaev Shymkent qalasyna jumys sapary barysynda Shymkent munaı óńdeý zaýytynyń óndiristik qýatymen tanysty, dep habarlaıdy Almaty-akshamy.kz Aqordaǵa silteme jasap.
Búginde zaýyttyń jobalyq qýaty jylyna 6 mıllıon tonna munaı óńdeı alatyn deńgeıge jetip, K-4, K-5 ekologıalyq sanatyndaǵy janar-jaǵarmaı óndire bastaǵan.
Zaýytty basqarýshy kompanıa – "Petro Qazaqstan Oıl prodakts" JSHS-niń prezıdenti Erbolat Qojabaev memleket basshysyna qaıta jańǵyrtýdan ótken óndiristiń qazirgi jumysy týraly baıandady.
Budan keıin zaýyt jumysshylarymen áńgimelesken Prezıdent óndiris ornynyń strategıalyq mańyzyna toqtaldy.
«Qazir zaýyt ishki naryqtyń 40 paıyzyn qamtamasyz etip otyr. Ónimniń sapasy da jaqsardy. Bul – óte aýqymdy jumys. Osynyń bári sizderdiń, ıaǵnı jumysshylardyń qajyrly eńbeginiń arqasynda múmkin bolyp otyr», – dedi Qasym-Jomart Toqaev.
Keıingi úsh jylda zaýyttyń benzın óndirisi 2,1 mıllıon tonnaǵa, avıakerosın óndirisi 340 myń tonnaǵa, dızel otyny 1,9 mıllıon tonnaǵa deıin artqan. Ónim tolyqtaı ishki naryqqa ótkiziledi.