Bıyl nan ónimi buryn belgilengen boljamdy deńgeıden asyp tústi
16 qazanda Qazaqstanda Nan kúni atap ótiledi. Merekelik kún 2019 jyly Úkimettiń qaýlysymen belgilendi, dep habarlaıdy Almaty-akshamy.kz Inform.kz-ke silteme jasap.
Bul kún nan ónimderiniń, sondaı-aq nan óndirisine qatysy bar barlyq mamandardyń: nan óndirýshiler, un tartýshylar men naýbaıshylardyń joǵary mártebesin nyǵaıtýǵa arnalǵan.
Bıyl elimiz merekege joǵary kórsetkishtermen kelip otyr.
Bıyl nan ónimi buryn belgilengen boljamdy deńgeıden asyp tústi. Máselen, josparlanǵan 19,5 mln tonna býnkerlik salmaqtaǵy astyqtyń ornyna búginde 21,7 mln tonnadan astam astyq bastyryldy. Sonymen qatar, 16,3 mln tonnadan astam bıdaı jınaldy, býnkerlik salmaqta 14,1 mln tonna jınalady dep boljanǵan bolatyn. Munyń bári nan ósirýshilerdiń qajymas eńbeginiń arqasynda múmkin boldy. Búgingi tańda qazaqstandyq fermerlerdiń astyqpen otandyq naryqty ǵana emes, ony bizdiń ónimderimizdiń sapalyq kórsetkishteri joǵary baǵalanatyn shet memleketterge saýdalaýǵa múmkindigi bar.
Jappaı egin jınaý aıaqtalǵannan keıin Qazaqstan Respýblıkasynyń Prezıdenti Qasym-Jomart Toqaev otandyq dıhanshylardy quttyqtap, densaýlyq pen eńbekterine tabys tiledi.
«Dıhandarymyzdyń joǵary kásibıliginiń, óz isine adaldyǵynyń jáne qajyrly eńbeginiń arqasynda agroónerkásip kesheni azyq-túlik qaýipsizdiginiń senimdi kepiline jáne ekonomıkalyq damýdyń basty qozǵaýshy kúshine aınaldy. Biz turǵylyqty jerine qaramastan barlyq azamattardyń jan-jaqty damýyna birdeı múmkindik beriletin Ádiletti Qazaqstandy quryp jatyrmyz. Sondyqtan aýyl turǵyndarynyń ál- aýqatyn arttyryp, turmys saltyn jaqsartý - bizdiń basty mindetimiz. Barsha dıhandarǵa zor densaýlyq pen baq bereke tileımin», - dedi Prezıdent quttyqtaý hatynda,
«Qurmetti aýyl sharýashylyǵy taýaryn óndirýshiler, sizder elimizdiń ıgiligi úshin jáne azyq-túlik qaýipsizdigin qamtamasyz etýde istep jatqan eńbekterińizdiń baǵasy ushan-teńiz. Qajyrly eńbekterińiz úshin alǵys aıtamyz. Mereıli mereke - Nan kúni qutty bolsyn!»,-delingen habarlamada.