Meshitke Toqaevpen birge bas múftı Naýryzbaı qajy Taǵanuly da bardy.
Memleket basshysy Qasym-Jomart Toqaev Nur-Sultandaǵy Haziret Sultan meshitine baryp, saıası qýǵyn-súrgin jáne asharshylyq qurbandarynyń rýhyna quran baǵyshtady, dep habarlaıdy Almaty-akshamy.kz Prezıdenttiń baspasóz qyzmetine silteme jasap.
Ekeýi jalpy zalda otyrdy. Osydan keıin Memleket basshysy «1932-1933 jyldardaǵy asharshylyq qurbandaryna taǵzym» monýmentine gúl shoǵyn qoıý rásimine qatysty.
Prezıdent eskertkishke gúl shoǵyn qoıyp, saıası qýǵyn-súrgin jáne asharshylyq kezinde qurban bolǵandardyń rýhyna taǵzym etti. Sharaǵa náýbet jyldary zardap shekken otandastarymyzdyń jaqyndary men týystary da qatysty.
Eńbek jáne halyqty áleýmettik qorǵaý mınıstrliginiń málimine sáıkes, 1921-1954 jyldary «halyq jaýlaryn anyqtaý» saıasaty saldarynan Qazaqstanda 100 myń adam sottaldy, olardyń 25 myńy eń joǵary jazalaý sharasy – atý jazasyna kesildi. Mıllıondaǵan qazaqstandyq 1932-33 jyldary asharshylyqtyń qurbany boldy.
Respýblıka aýmaǵynda GÝLAG qurylymynyń eń iri lagerleri – ALJIR, Steplag pen Karlag boldy. Qýǵyn-súrgin jyldary Qazaqstan lagerlerine 5 mıllıonnan astam adam jer aýdaryldy. Keıbir málimetter boıynsha, tutqyndardyń jalpy sany bul kórsetkishten edáýir kóp.
1930-1940 jyldary mıllıondaǵan keńes azamaty Qazaqstanǵa deportasıalandy. 1937 jyldyń kúzinde respýblıkaǵa júzdegen myń kárister, túrikter, ırandyqtar, kúrdter men ázerbaıjandar qonys aýdardy. Sondaı-aq, Uly Otan soǵysy jyldarynda elge nemis, grek, sheshen, ıngýsh, qarashaı, balqar, qyrym tatarlary jáne basqa da halyqtar jer aýdaryldy. Olardyń jalpy sany - 1 mıllıon 200 myńnyń shamasynda.