Prezıdent Qorǵanys mınıstri Rýslan Jaqsylyqovty qabyldady.
Rýslan Jaqsylyqov qorǵanys vedomstvosynyń bıylǵy birinshi jartyjyldyqta atqarǵan jumystarynyń qorytyndysy jóninde baıandady, kezeńdik ózgeristerge negizdelgen jaýyngerlik daıarlyqtyń jańa formatyn jáne komandırlerdiń basqarý qabiletin jetildirý modelin engizý jaıynda aıtty. Terıtorıalyq qorǵanysty nyǵaıtýǵa qatysty qabyldanyp jatqan sharalar týraly jetkizdi, dep habarlaıdy Almaty-akshamy.kz Aqordaǵa silteme jasap.
Árdaıym jaýyngerlik daıyndyqta bolatyn bólimderdi qarý-jaraqpen jáne áskerı tehnıkamen jabdyqtaý barysy, sondaı-aq otandyq óndiristiń mobıldi jáne modýldik komponentterge kóshirilýi týraly málimet berdi;
Qarýly Kúshterdiń bitimgerlik qyzmeti týraly arnaıy baıandady; áskerge shaqyrylatyn jáne merzimdi qyzmetin ótegen azamattar týraly málimetterdi sıfrlyq júıege kóshirý sharalary jóninde aıtty. Áskerge shaqyrylatyn azamattarǵa kredıttik demalys berý, sondaı-aq bilim alýǵa jeńildikter jasaý úshin qabyldanyp jatqan sharalar týraly jetkizdi (búginde 2,5 myń sarbazdyń nesıesi keıinge shegerildi jáne áskerı qyzmetin ótegen 1,5 myń jaýyngerge joǵary oqý oryndarynda oqýǵa oryn bólindi).
Jyl basynan beri merzimdi áskerı qyzmetin ótep, zapasqa shyǵarylǵan 700-ge jýyq sarbaz júrgizýshi, mehanık, mashınıst, slesar, aspaz jáne basqa da eńbek naryǵynda suranysqa ıe mamandyqtar boıynsha bilim aldy.
Prezıdent atalǵan bastamalardy, atap aıtqanda Joǵary bilim jáne ǵylym mınıstrligimen birlesip, bilim alýǵa jeńildik beretin kvotalar bólý, merzimdi áskerı qyzmetin ótegenderge memlekettik bilim granttaryn usyný, sondaı-aq olardyń zańnamalyq turǵyda bekitilýin jalǵastyrý máselesin nazarǵa aldy.
Qasym-Jomart Toqaev Qarýly Kúshterdiń jaýyngerlik daıyndyǵyn kúsheıtý máselesine basa mán bere otyryp, birqatar tapsyrma berdi.