Derekti fılm «Eva. Batyr qyz» dep atalady.
Qazaqstanda kókparshy qyz Eva Jıgalına jaıly «Eva. Batyr qyz» atty derekti fılm túsirildi. Bul bala kezinen dala tósinde oıqastap, bar mádenıetin boıyna sińirip ósken tabandy qyzdyń óziniń súıikti isimen aınalysý haqy úshin kúresi týraly oqıǵa, dep habarlaıdy Almaty-akshamy.kz.
Fılm prodúseriniń sózinshe, týyndyny shetelde usynýǵa bolady, óıtkeni týyndynyń áleýeti joǵary deńgeıde.
Dástúrli qasań qoǵamda áıelderge kókparǵa qatysýǵa qatań tyıym salynǵan. Biraq Eva qıyndyqtarǵa moıymastan tabandylyq tanytyp, stereotıpterdi buzdy, áleýmettik jáne mádenı tosqaýyldardy eńsere bildi. Ol, kókpar tek erlerdiń oıyny degen myqtylarmen teketireste boldy. Degenmen, Evany qoldaıtyndar da tabylyp, onyń jigerine, armanyna adal minezine laıyqty baǵasyn bere aldy. Olar Evany jigerlendirip, tosqaýyldarǵa tótep berýine kómegin aıamady. Eva kádimgi qara kúshten de, epten de kende emes; al onyń ishki jigeri, jalyny men tabandylyǵy - kórgen adamdy qanattandyrady.
Fılm kórermendi emosıalyq saıahatqa úıirip áketip, sol ýaqytta - keıipkerdiń aldyndaǵy qıyndyqtardy, onyń sáıgúlikke degen mahabbatyn pash etedi.
«Ata-anam kókparǵa qatysýǵa tyıym salǵan. Biraq bir jerde kókpar bolyp jatyr dese delebem qozyp, úıden qashyp ketetinmin. Kókparǵa alǵash ret 15 jasymda qatystym. Shaqyrýsyz barǵan edim. Ózim de tań qaldym. Atta otyryp, erlerdiń kókparda jan alyp, jan bergenin kórdim. Olarǵa qosyla ketip, serkeni tartyp alyppyn. Erler meni qýa jóneldi, biraq ustatpaı kettim. Qazir jurttyń kókparǵa qyzyǵýy artqanyn kórip júrmin. Maǵan uldar da, qyzdar da hat jazyp, úıretshi dep jatady», - deıdi Eva Jıgalına.
«Eva. Batyr qyz» derekti dramasy Temirbek Amanjoldyń rejıserlik alǵashqy qadamy. Temirbektiń ózi de atpen týrızmdi jáne atqa otyrý mádenıetin zerttep júr. Evanyń hıkaıasy - salt-dástúr, jiger men qurbandyq shıelenisken álemge shytyrman saıahat. Osyndaı qym-qýyt álemde názik jan aǵysqa qarsy júzip, mahabbat pen jalynnyń almaıtyn qamaly joǵyn aıshyqtaıdy deıdi ol.
«12 jyldan beri attardy fılmderge túsirip, atqa otyrý mádenıetin, neonomadızmdi zerttep júrmin. «Eva. Batyr qyz» fılminde qazaqylyqtyń formýlasyn pash etkim keledi. Eli bóten, dini bóten basqa jurttar nelikten osy oıynǵa ǵashyq bolyp, bar ómirin sarp etkizýge bar? Kókpar men attar nesimen tartady? Eńbekti osy suraqtarǵa jaýap izdeıtin zertteý deseńiz de bolady», - deıdi Temirbek Amanjol.
Fılmniń prodúseri Dýman Qojahmettiń aıtýynsha, osy fılmniń halyqaralyq deńgeıge shyǵýǵa áleýeti mol. Qazir birneshe sheteldik strımıng-servıstermen prokat týraly kelissózder júrip jatyr deıdi ol.
Derekti fılmdi Black & White Production kompanıasy QR Mádenıet jáne sport Mınıstrliginiń tapsyrysymen Ulttyq kınony qoldaý memlekettik ortalyǵynyń qoldaýymen 2022 jyly túsirdi.
