Memleket basshysy Qasym-Jomart Toqaev Qazaqstannyń Áskerı doktrınasyn bekitti, dep habarlaıdy Almaty-akshamy.kz Inform.kz-ke silteme jasap.
Qujatty Qorǵanys mınıstrligi basqa kúshtik qurylymdarmen jáne múddeli memlekettik organdarmen birlesip ázirlegen.
Memleket basshysy 2021 jylǵy «Halyq birligi jáne júıeli reformalar – el órkendeýiniń berik negizi» atty Joldaýynda Áskerı doktrınany qaıta qaraý qajettigin málimdegen edi. Qarýly kúshterdi, basqa da áskerler men áskerı quralymdardy qaıta formattaý týraly birqatar tapsyrmalar bergen Prezıdent qorǵanys qabiletin nyǵaıtý, qaýip-qaterlerge den qoıýdyń jedeldigin arttyrý memlekettik mańyzy bar basymdyqtarǵa aınalýǵa tıis ekenin atap ótti.
Qujatta áskerı qaýipter men qaýipsizdikke áser etetin zamanaýı jaǵdaılar men faktorlar kórsetilgen. Oǵan áskerı-saıası jáne áskerı-strategıalyq salalardaǵy qyzmettiń jańa baǵyttary, normatıvtik quqyqtyq aktilerdi júıeleý jáne áskerı josparlaý júıesin engizý sharalary engizilgen.
Qarýly kúshterdiń jaýyngerlik áleýetin arttyrý maqsatynda Arnaıy operasıalar kúshterin damytý jáne olardyń basqa memlekettik organdardyń arnaıy maqsattaǵy bólimshelerimen ózara is-qımylyn keńeıtý kózdelgen.
Áskerı doktrınanyń jańa redaksıasy memlekettiń áskerı qaýipsizdigi men qorǵanysyn qamtamasyz etý jónindegi kózqarasyn qazirgi zamanǵy talaptar men jaǵdaılarǵa beıimdeýge múmkindik beredi, sondaı-aq jańa qaterler men táýekelderge den qoıýdaǵy eldiń áskerı áleýetin arttyrady.
Áskerı doktrınaǵa ózgerister engizý týraly jarlyq zańdy kúshine endi.