Ótken bozdaqtarymyzdy máńgi este saqtaý – qasıetti boryshymyz – Toqaev
Bul týraly Almaty-akshamy.kz habarlaıdy Akorda.kz-ke silteme jasap.
Qymbatty otandastar!
Sizderdi Jeńis kúnimen shyn júrekten quttyqtaımyn!
9 mamyrdyń tól tarıhymyzdaǵy orny erekshe. Bul – janqıarlyqpen el qorǵaǵan atalarymyz ben ákelerimizdiń, ájelerimiz ben analarymyzdyń rýhyna taǵzym etetin kún. Bul – fashızmdi jeńgen erlerdiń eren erligin jadymyzda jańǵyrtatyn kún.
Surapyl soǵysta halqymyz kúsh-jigerin sarp etip, orasan zor shyǵynǵa ushyrady. Maıdangerlerdiń qaharmandyǵy men qaısarlyǵynyń, tyl eńbekkerleriniń jankeshtiliginiń arqasynda jeńiske jettik. Eldiń azattyǵy men urpaqtyń jarqyn bolashaǵy úshin janyn pıda etken bozdaqtarymyzdy máńgi este saqtaý – qasıetti boryshymyz.
Ókinishke qaraı, qan maıdannyń qıametin basynan ótkergen ardaqty aǵa býynnyń qatary jyl ótken saıyn sıreı túsýde. Qazaqstanda Jeńistiń 77 jyldyǵyn nebári 376 ardager, 68 347 tyl eńbekkeri ǵana qarsy alyp otyr. Elimizdiń barsha azamattary ózderińizge bas ıedi.
Memleket soǵys ardagerlerine jan-jaqty qoldaý kórsetip keledi. Olar qoǵamymyzdyń da qurmetin kórip, qamqorlyǵyna bólenýge tıis.
Barshańyzǵa zor densaýlyq, baq-bereke tileımin! Jeńis kúni qutty bolsyn!