Memleket basshysy Qasym-Jomart Toqaev Otan qorǵaýshy kúnimen quttyqtady
Memleket basshysy Qasym-Jomart Toqaev Otan qorǵaýshy kúnimen quttyqtady, dep habarlaıdy Almaty-akshamy.kz Akorda.kz-ke silteme jasap.
Qurmetti qazaqstandyqtar!
Sizderdi Otan qorǵaýshy kúnimen shyn júrekten quttyqtaımyn!
Bul – batyr babalardyń dańqty joly men búgingi býynnyń týǵan elge qyzmet etý dástúrin toǵystyratyn mereke.
Otan qorǵaý – qasıetti paryz ári mártebeli mindet. Halqymyz antyna adal, sertine berik perzentterin erekshe qadirleıdi.
Bıyl Qazaqstan Qarýly Kúshteriniń qurylǵanyna 30 jyl tolyp otyr. Osy kezeńde aıbyndy armıamyz qasterli Táýelsizdigimizdiń jáne memlekettiligimizdiń myzǵymas qorǵanyna aınaldy.
Qorǵanys áleýetimizdi arttyrý, sarbazdardyń daıyndyǵyn kúsheıtip, olarǵa jan-jaqty qoldaý kórsetý – memlekettiń basty mindetteriniń biri.
Beıbit ómirimiz ben tynyshtyǵymyzdy, jerimizdiń tutastyǵyn saqtaý úshin qyzmet etip júrgen sardarlar men sarbazdarǵa rızashylyǵymdy bildiremin.
Erjúrek jaýyngerlerimiz el senimin aqtaıdy dep senemin!
Barshańyzǵa baq-bereke jáne tolaǵaı tabys tileımin!