Parlament palatalarynyń birlesken otyrysynda Prezıdent Qasym-Jomart Toqaev óńdeý salasyndaǵy ınvestorlardy alǵashqy 3 jylda salyqtan bosatýdy usyndy, dep habarlaıdy Almaty-akshamy.kz.
«Geologıalyq barlaý salasy erekshe nazar aýdarýdy qajet etedi. 2018 jyly mıneraldy shıkizat bazasyn tolyqtyrý maqsatynda taýken sektoryn basqarý baǵytynda jańa zańnama qabyldandy. Alaıda, ol tolyqqandy jumys istep kete almady. Saldarynan resýrstarǵa baı elimizde mańyzdy geologıalyq jańalyqtar ashylmaı keledi», - degen Qasym-Jomart Toqaev jaǵdaıdy shuǵyl túrde ózgertý kerektigin eskertti.
«Taýken sektoryn basqarý júıesin qysqa merzimde jańǵyrtý qajet. Kóptegen elderde salanyń negizgi qozǵaýshy kúshi jeke kompanıalar bolyp otyr. Sondyqtan iri jeke menshik ınvestısıalardy tartý salanyń áleýetin ashýǵa sheshýshi dárejede kómektesedi. Ol úshin ıkemdi retteýshi jáne fıskaldyq jaǵdaılar qajet», - dedi Prezıdent.
Memleket basshysy geologıalyq zertteýdi óz qarajaty esebinen júzege asyratyn ınvestorlar jer qoınaýyn paıdalanýǵa basym quqyq alýy qajettigin atady.
«Keshendi memlekettik saraptamany engizý jáne prosesti tolyq sıfrlandyrý arqyly jobalardy maquldaý merzimderi men rásimderin eki ese qysqartý qajet. Úkimettiń mindeti – 2026 jylǵa qaraı geologıalyq-geofızıkalyq zertteý aýmaǵyn qazirgi 1,5 mıllıonnan 2 mıllıon 200 myń sharshy shaqyrymǵa deıin jetkizý. Basym mindetterdiń biri «jańa munaıǵa» aınalǵan sırek metaldardyń ken oryndaryn ıgerý bolýǵa tıis. Osy salada óz áleýetin iske asyra alatyn elder búkil álemniń tehnologıalyq ósim baǵdaryn aıqyndaıdy. Jyl sońyna deıin biz salany damytý týraly keshendi paıymdy ázirleýimiz kerek. Óńdeý ónerkásibin qoldaý úshin sheteldik jáne otandyq ınvestorlardy alǵashqy úsh jylda salyqtar men basqa da mindetti tólemderden bosatý qajet. Bul óńdeýshi ındýstrıaǵa eleýli serpin berýi tıis qaǵıdatty másele», - dedi Qasym-Jomart Toqaev.