Konstıtýsıalyq sot – elimiz úshin óte mańyzdy ınstıtýt.
Prezıdent Qasym-Jomart Toqaev jyl basynan qyzmetin bastaǵan Konstıtýsıalyq sottyń jańa ákimshilik ǵımaratyna baryp, taǵaıyndalǵan sýdıalarmen kezdesti, dep habarlaıdy Almaty-akshamy.kz Aqordanyń baspasóz qyzmetine silteme jasap.
Memleket basshysy Konstıtýsıalyq sot el ómirinde aıryqsha ról atqaratyn organ ekenin atap ótip, buǵan deıin 27 jyl boıy tabysty jumys istegen Konstıtýsıalyq keńes múshelerine jáne onda ár kezeńde eńbek etken qyzmetkerlerge alǵys aıtty.
«Búginde Qazaqstan jańa dáýirge qadam basty, buryn-sońdy bolmaǵan biregeı saıası reformalar júzege asyryldy. Qazirgi tańda dúnıejúzinde dál osyndaı aýqymdy, mazmundy reformalar jasap jatqan el biren-saran. Bul – aqıqat. Muny búkil álem moıyndap otyr. Qazaqstan reformator memleketke aınaldy. Jalpy, elimizde kóptegen ózgeris bolyp jatyr. Azamattardyń konstıtýsıalyq quqyǵyn qorǵaýǵa basa mán berilip otyr. Bul jumysqa qoǵam ókilderi belsene qatysýǵa yntaly. Sondyqtan men Konstıtýsıalyq sot qurý týraly bastama kóterdim. Azamattarymyz jalpyhalyqtyq referendýmda osy jáne basqa da usynystarǵa qoldaý bildirdi», – dedi Prezıdent.
Memleket basshysy Konstıtýsıalyq sot barlyq zańdar men zańǵa sáıkes aktilerdiń Konstıtýsıaǵa sáıkestigin qamtamasyz etýge tıis ekenine toqtaldy.
«Shyn máninde, Konstıtýsıalyq sot – elimiz úshin óte mańyzdy ınstıtýt. Endi azamattarymyz Konstıtýsıaǵa qaıshy keletin normalardy zańsyz dep taný úshin Konstıtýsıalyq sotqa tikeleı ózderi shaǵymdana alady. Sonymen qatar Bas prokýror jáne Adam quqyqtary jónindegi ýákil de Konstıtýsıalyq sotqa júginýge quqyǵy bar. Jalpy, prokýratýra, sot, quqyq qorǵaý organdarynyń jumysyna qoıylatyn talap aıtarlyqtaı kúsheıedi. Konstıtýsıalyq sot depýtattardyń jáne Úkimettiń zań shyǵarý jumysyna oń yqpal etedi. Bir sózben aıtqanda, Konstıtýsıalyq sot adam quqyqtaryn qorǵaý júıesiniń basty tiregine aınalady», – dedi Qasym-Jomart Toqaev.
Memleket basshysy qoǵam Konstıtýsıalyq sottyń qyzmetinen oń ózgerister kútip otyrǵanyn, qazylardyń óz mindetin adal atqarýy halyqtyń, BAQ pen halyqaralyq qurylymdardyń jiti nazarynda bolatynyn eske saldy.
«Qazylardyń osy quramy memlekettik mańyzy zor mindetterin tabysty atqaryp, qoǵam men azamattardyń úmitin aqtaıdy dep sanaımyn. Konstıtýsıalyq sot quramyna belgili quqyqtanýshy ǵalymdar men túrli salada kóp jyldyq tájirıbesi bar zańgerler kirdi. Nátıjesinde teorıa men tájirıbe ushtasty. Konstıtýsıalyq sot tóraǵasy Elvıra Azımova uzaq ýaqyt boıy ádilet organynda qyzmet etti, adam quqyǵyn qorǵaý máselelerimen aınalysty, sondaı-aq halyqaralyq arenada memleket múddesin qorǵady. Onyń bul tájirıbesi jańa salada zor paıdasyn tıgizedi. Konstıtýsıalyq sot qyzmetiniń normatıvtik bazasy men erejelerin ázirleý boıynsha aýqymdy jumys atqaryldy. Endi Konstıtýsıalyq sottyń qyzmeti barysynda qajettigine qaraı bul bazany jetildirý kerek bolatyn shyǵar. Jalpy, jańadan qurylǵan ınstıtýt el aýmaǵynda Ata zańnyń ústemdigin qamtamasyz etýi úshin barlyq jaǵdaı jasaldy», – dedi Prezıdent.
Memleket basshysynyń aıtýynsha, zań ústemdigi qaǵıdatynyń myzǵymastyǵy elimizdegi saıası reformalardyń ózegi sanalady. Júrgizilip jatqan reformalardyń sany jaǵynan, eń bastysy, mazmuny men sapasy turǵysynan Qazaqstan álemde kóshbasshy elderdiń qataryna kiretini sózsiz.
«Shyn máninde, tek byltyr atqarylǵan jumystar bizdiń qoǵamdaǵy ózgeristerdiń aýqymy men tereńdigi týraly oń áser qaldyrmaýy múmkin emes. Qazaqstan memleket retinde aıtarlyqtaı jańǵyrdy. Bul derekti álemdik qoǵamdastyq ashyq moıyndady. Oǵan kóptegen halyqaralyq baılanys pen eń joǵary deńgeıdegi kezdesýler dálel. Konstıtýsıalyq sot Ádiletti Qazaqstannyń aınasy bolady desek, artyq aıtqandyq emes», – dedi Qasym-Jomart Toqaev.
Memleket basshysy Jańa, Ádiletti Qazaqstannyń basty qaǵıdaty – ádildik ekenine nazar aýdaryp, qazylardyń osy mańyzdy mindetti abyroımen atqaratynyna senim bildirdi.
«Halqymyz qara qyldy qaq jarǵan qazylarǵa erekshe qurmetpen, syılastyqpen qaraıdy, «týra bıde týǵan joq» dep sýdıalarǵa zor úmit artady. Árbir sheshim Ata zańǵa sáıkes qabyldanýǵa tıis. Óıtkeni bul, eń aldymen, elimizdiń taǵdyryna yqpal etetin sheshimder bolmaq», – dedi Prezıdent.
Óz kezeginde Konstıtýsıalyq sot tóraǵasy Elvıra Azımova Memleket basshysyna jańa organ qyzmetiniń negizgi baǵyttary men mindetteri týraly baıandady. Sondaı-aq Konstıtýsıalyq sot qoǵam suranysy jáne memleket qajettiligin óteý úshin aıanbaı eńbek etetinine senim bildirdi.