Jýyrda Prezıdent Qazaqstan halqyna Joldaýyn arnady. Soǵan qatysty ún qosqandardyń biriniń pikirin Almaty-akshamy.kz Assembly.kz-ke silteme jasap usynady.
1 qyrkúıek «Bilim kúni» merekesimen qatar elimizdiń tarıhynda, jańa bir saıası ahýal oryn alyp otyrǵany barshamyzǵa aıan. Elimiz jyl saıyn úlken úmitpen kútetin el prezıdentiniń joldaýy 2020-2021 jańa oqý jylynyń bastalýymen qatar kelýi, árbir azamatynyń erekshe nazaryn aýdardy. El Prezıdenti Qasym-Jomart Kemeluly Toqaevtyń Qazaqstan halqyna joldaýy búkil álemdi alańdatyp otyrǵan pandemıamen kúres joldaryn, onyń elimizge alyp kelgen zardaby men ózgeristerin aıta kelip, elimizdiń áleýmettik damýyna, el turǵyndarynyń tabysy men jumys oryndarynyń saqtalýyn, halqymyzdyń densaýlyǵy men ómirin saqtaý jolyndaǵy jumystarǵa basty nazar aýdarý kerektigin qadap aıtty. Sondaı-aq álem pandemıany tolyq jeńýi úshin kem degende 2 jyl merzim ýaqyt kerek ekenin, al qazirgi tańdaǵy pandemıa alyp kelgen ekonomıkalyq-áleýmettik daǵdarysty qalypqa túsirýge 5 jyl ýaqyt ketetini de aıtyldy. Búgingi el Prezıdentiniń joldaýy elimizdiń bolashaq damýy men erteńgi kúnge betburysyn aıqyndap berdi. Barlyq baǵyttardyń damýy, el taǵdyry úshin mańyzdy. Qazaq halqynyń árbir azamatynyń kókeıinde júrgen máseleni sheshý jolyna arnalǵan jańa joldaý, el damýy men halqymyzdyń ómirinde birshama jańashyldyqtyń bolatynyn kórsetip bergendeı.
El Prezıdenti óz joldaýynda, qarapaıym eńbek adamynyń, zeınetkerlerdiń, memlekettik qyzmetkerler men bilim-ǵylym salasyndaǵy eńbek etip júrgen ǵalymdardyń, qala berdi memlekettik basshylyqta otyrǵan depýtattar men mınıstrlerdiń, quqyq qorǵaý organdary men densaýlyq saqtaý salasy qyzmetkerleriniń árqaısynyń mindetin, qyzmetindegi ózgerister men jańalyqtardy sanamalap aıtyp ótti. Ásirese sońǵy ýaqyt kóleminde densaýlyq salasy qyzmetkerleriniń eńbeginiń baǵalanýy kerektin, áleýmettik kómektiń taǵaıyndalýyn tapsyrdy. Sebebi pandemıa ýaqytynda aldyńǵy shepte aýyr dertpen kúresken aq halatty abzal jandar ekeni barshamyzǵa belgili. Qandaı zaman, qaı qoǵam bolmasyn bilim alýdy eshqashan shetke ysyryp qoıǵan emes. Qazirgi qoǵam bilimdi jastardyń qoǵamy. Jas býynǵa bilim berý jolynda eńbek etip júrgendikten bilim salasynda bolyp jatqan barlyq ózgerister men jańalyqtar meniń janyma jaqyn. El damýyndaǵy barlyq mańyzdy degen máselelerdi atap aıtyp, sheshý joldaryn usyna kele, el prezıdenti óz joldaýyndaǵy besinshi másele retinde bilim berý salasyna toqtalyp ótti. Álem elderindegi pandemıalyq jaǵdaılardy eskere, elimizdegi karantındik jaǵdaıdy qatań saqtaı otyryp, bilim berý salasynyń qashyqtyqtan uıymdastyrylyp otyrǵanyn, sondaı-aq qashyqtyqtan bilim berý júıesiniń ádettegi dástúrli sabaqqa jetpeıtinine toqtaldy. Dástúrli júıe boıynsha bilim alýǵa barsha jaǵdaı jasaýdy tapsyryp otyr. Árbir oqýshy men ustazdyń densaýlyǵy men ómirin saqtaý jolyn eskere otyryp, dástúrli júıede bilim berýge daıyndyq jumystaryn júrgizýdi de atap aıtty. Qashyqtyqtan bilim berý júıesinde de barynsha damytylǵan onlaın bilim berý platformanyń daıyndalý kerek ekenin tilge tıek etti. Basty nazardy jasóspirimderdiń sport pen shyǵarmashylyq turǵyda bilim alýyna jaǵdaı jasaýǵa jumsaýdy tapsyrdy. Árbir jas búldirshinge mektepke deıingi oqý-tárbıe berilýi kerektigin, balabaqshalar men mektepke deıingi bilim berý oryndaryn kóbeıtý úshin jumys jasaýdy, bilimdi urpaqtyń el bolashaǵy ekenin eske saldy.
Sonymen qatar Prezıdentimiz jyldaǵy joldaýynda atap aıtatyn taǵy bir másele ustazdardyń eńbekaqysy jaıly boldy. Aldaǵy qańtar aıynda el ustazdarynyń eńbekaqysyn 25 paıyzǵa ósirýdi tapsyrdy. Ózim de ustaz retinde memleket tarapynan jasalyp otyrǵan árbir kómek bizdi jigerlendire túsedi degim keledi. Men elimizdiń damýy men jańarýy jolynda bar kúsh jigerimizdi sala otyryp, eńbek etý bizdiń basty paryzymyz sanaımyn. El prezıdenti óz joldaýynyń túıini retinde ult ustazy Ahmet Baıtursynulynyń «Bilimdi bolýǵa oqý kerek. Baı bolýǵa kásip kerek. Kúshti bolýǵa birlik kerek. Osy kerekterdiń jolynda jumys isteý kerek», degen danalyq sózimen bekitti. Qazirgideı jańarǵan jańa zamanda elimizdiń árbir azamaty joǵary bilim men tabandy eńbektiń nátıjesinde ǵana bıik belesterden kórinetini ashyq jetkizdi. El azamattaryn, otanymyzdyń aldynda adal qyzmet etýge, abyroıly is jasaýǵa, tereń bilim alyp, erinbeı eńbek etýge shaqyrdy.