Prezıdent Qazaqstan men Fransıa arasyndaǵy ekonomıkalyq seriktestik barlyq salada ártaraptanyp, keńeıe beretinine senim bildirdi.
Sharaǵa Total Energies, Orano, Saint Gobain, Boehringer Ingelheim France, Soufflet Group, BPI France, Vicat, Syctom, Pellenc, FICT mal sharýashylyǵy qaýymdastyǵy, Total Eren, PCM, Safran, Thales, Groupe EDF, Assystem, Alstom, Evolution International, MHB SAS, Exa International, Airbus, Rungis – Semmaris, MBDA, SOPREMA, Lýı Vıkat jáne basqa da iri kompanıalardyń basshylary qatysty, dep habarlaıdy Almaty-akshamy.kz.
Memleket basshysy óz sózinde halyqaralyq qoǵamdastyq búginde kúrdeli geosaıası jáne ekonomıkalyq máselelermen betpe-bet kelip otyrǵanyn atap ótti. Onyń aıtýynsha, jańa syn-qaterler jańa múmkindikterge jol ashady. Qıyn-qystaý kezeń – baılanys ornatyp, seriktestikti damytý úshin qolaıly ýaqyt.
– Biz ortaq ekonomıkalyq jáne saıası múddelerimizdi odan ári ilgeriletý úshin Fransıamen jáne jalpy Eýropamen aradaǵy qarym-qatynasty jolǵa qoıǵymyz keledi, – dedi Qasym-Jomart Toqaev.
Memleket basshysy Qazaqstan erkin jáne básekege qabiletti naryqtyq ekonomıkany nyǵaıtýdy kózdep otyrǵanyn atap ótti. Sondaı-aq monopolıadan arylý Qazaqstandy qýatty, básekege qabiletti jáne ınvestorlarǵa tartymdy etedi dep sanaıdy. Ol bıznes ahýaldy jaqsartý úshin zańnamaǵa odan ári tıisti ózgertýlerdi engizýge daıyn ekenin jetkizdi.
– Bul jumystyń alǵashqy nátıjeleri makroekonomıkalyq derekterden kórinip otyr. Bıylǵy 10 aıda JİÓ ósimi 2,5 paıyzdy qurady. Bul boljanǵan nátıjeden joǵary. Qoldanystaǵy tasymal tizbeginiń úzilýine qaramastan, bizdiń eksportymyz 50 paıyzǵa (63,8 mlrd dollar) jýyq ósti. 2022 jyldyń alǵashqy alty aıynda sheteldik seriktesterimiz bizdiń ekonomıkamyzǵa shamamen 15 mıllıard dollar ınvestısıa quıdy. Bul ótken jylmen salystyrǵanda shamamen 30 paıyzǵa kóp. Aldaǵy 7 jylda biz 150 mıllıard dollar tikeleı shetel ınvestısıasyn tartýdy josparlap otyrmyz. Qazaqstan ınvestısıa salý jóninen Ortalyq Azıadaǵy eń tartymdy el bolýy úshin ınvestısıalyq saıasatymyzdy únemi jetildirip otyramyz, – dedi Qasym-Jomart Toqaev.
Memleket basshysy Fransıa Qazaqstannyń negizgi ekonomıkalyq áriptesteriniń biri ekenin atap ótti.
– Bıylǵy toǵyz aıda Qazaqstan men Fransıa arasyndaǵy taýar aınalymy 12 paıyzǵa ósti. Búginde 170-ten astam fransýz kompanıasy, sonyń ishinde Total Energies, Orano, Airbus, Vicat, Air Liquide, Alstom, Saint-Gobain jáne basqalary Qazaqstanda tabysty jumys istep jatyr. Olardyń barlyǵy Qazaqstan ekonomıkasyna eleýli úles qosyp keledi. Fransıanyń Qazaqstandaǵy Saýda ókildigin qurý yntymaqtastyǵymyzdy nyǵaıtýǵa óz septigin tıgizer edi dep sanaımyn. Biz onyń tezirek qurylǵanyn quptaımyz. Sondaı-aq fransýz kompanıalaryn elimizdiń ınvestısıalyq múmkindikterin qarastyrýǵa shaqyramyn. Jıynǵa qatysýshylardyń bárine Qazaqstan qaýipsiz jáne turaqty ınvestısıalyq orta qalyptastyrýǵa kepildik beretinin nyq senimmen aıta alamyn, – dedi Memleket basshysy.
Qasym-Jomart Toqaev kezdesýge qatysýshylarǵa ınvestısıalyq yntymaqtastyqtyń keleshegi mol baǵyttary týraly egjeı-tegjeıli aıtty.
– Biz agroónerkásip keshenin damytyp jatyrmyz. Onyń óndiris kólemin 2,5 ese ulǵaıtý jáne eksportymyzdyń kólemin eki ese arttyrý josparlanyp otyr. Tıisinshe, biz aýyl sharýashylyǵy ónimderin tereń óńdeýge salynatyn ınvestısıany yntalandyramyz jáne Fransıanyń azyq-túlik óndirýshilerin osyǵan baılanysty ınvestısıalyq múmkindikterdi qarastyrýǵa shaqyramyz. Biz osyndaı jobalarǵa jan-jaqty qoldaý kórsetýge daıynbyz. Ekinshiden, bul – yntymaqtastyq ornatýǵa zor áleýeti bar ekonomıkanyń naqty sektory. Biz tabıǵı resýrstar qory boıynsha álemde altynshy jáne taý-ken óndirisiniń jalpy kólemi boıynsha (munaı men gazdy qospaǵanda) onynshy oryndamyz. 2040 jylǵa qaraı asa mańyzdy materıaldar men sırek kezdesetin metaldarǵa degen álemdik suranys tórt ese artady dep boljanyp otyr. Úkimet qajetti qoldaý kórsetýge daıyn. Biz kompanıalar ózderiniń ozyq tájirıbelerin, noý-haýyn jáne jańa tehnologıalaryn ákeledi dep úmittenemiz, – dedi Prezıdent.
Sonymen qatar Memleket basshysy energetıka, kólik jáne logıstıka, sıfrlandyrý salalaryndaǵy yntymaqtastyq perspektıvalaryna toqtaldy.
Prezıdent Qazaqstan men Fransıa arasyndaǵy ekonomıkalyq seriktestik barlyq salada ártaraptanyp, keńeıe beretinine senim bildirdi.
– Búgingi konstrýktıvti dıalog bıznesti órkendetýge jáne ortaq damýǵa nıetti ekenimizdi taǵy da naqtylaýǵa múmkindik beredi. Meniń ákimshiligim fransýz kompanıalaryna óńirdegi ekonomıkasy eń qarqyndy damyp kele jatqan elderdiń birinde bıznes júrgizýi úshin barlyq qajetti qoldaý kórsetýge daıyn, – dedi Memleket basshysy.
Kezdesý barysynda Qazaqstan-Fransıa iskerlik keńesiniń teń tóraǵasy Iv-Lýı Darrıkarrer, Syrtqy saýda, ekonomıkalyq tartymdylyq jáne sheteldegi fransýz azamattarynyń isteri jónindegi mınıstr-delegat, Qazaqstan-Fransıa Úkimetaralyq komısıasynyń teń tóraǵasy Olıve Besht, Airbus kompanıasynyń atqarýshy vıse-prezıdenti Van Versh, Thales kompanıasynyń vıse-prezıdenti Marıon Parada, Vicat kompanıasynyń prezıdenti Gı Sıdos, Safran kompanıasynyń aǵa vıse-prezıdenti Stefan Rollan, Saint-Gobain kompanıasynyń aǵa vıse-prezıdenti Patrık Dúpın, PCM prezıdenti Marıo Martınonı, Soufflet Group kompanıasynyń bas dırektory Krıstof Passeland, Boehringer Ingelheim France ókili Naıdjel Svıft jáne Evolution International kompanıasynyń bıznesti damytý jónindegi dırektory Sırıl Djoss sóz sóıledi.