Almaty-akshamy.kz saıtynyń búgingi jańalyqtaryna sholý – kún kerýeni
Tótenshe jaǵdaıǵa daıyndyqty balabaqshadan bastaý kerek
Prezıdent Almatydaǵy sapary barysynda seısmıkalyq qaýipsizdik jóninde keńes ótkizdi.
«Ashyǵyn aıtý kerek, Almatyda bolǵan tótenshe jaǵdaı kezinde tıisti organdar shuǵyl áreket etýge tolyq daıyn bolǵan joq. Al qala turǵyndary ne isterin bilmeı, abdyrap qaldy. Degenmen bul jıynnyń basty maqsaty – syn aıtý emes, naqty sheshimder qabyldaý. Mysaly, jurttyń kópshiliginde «tótenshe jaǵdaıǵa qajetti chemodan» da joq bolyp shyqty. Tıisti oqý-úıretý sharalary mektepten, tipti balabaqshadan bastalýy kerek. Buryn Almatyda osyndaı tájirıbe bolǵan. Sony qaıta jańǵyrtý qajet. Sebebi qazir azamattardy tótenshe jaǵdaıǵa daıyndaý júıesi talapqa saı emes. Quzyrly organdar halyqqa jan-jaqty túsindirý jumysyn júrgizýge tıis. Oqý oryndarynda, memlekettik mekemelerde turaqty jattyǵý ótkizip turý qajet. Bul – óte mańyzdy. Osy jumysty dereý qolǵa alý kerek», – dedi Prezıdent.
Terorızmdi nasıhattaǵandar ustaldy
Ulttyq qaýipsizdik komıteti Astana, Shymkent qalalarynda jáne Aqtóbe oblysynda dinı radıkaldar áreketiniń jolyn kesý úshin operasıa ótkizdi. Jedel qyzmetkerler terorızmdi nasıhattady jáne qarjylandyrdy degen kúdikpen úsh adamdy ustap, qamaýǵa aldy.
Hokeıden qola aldyq
Bul Qazaqstan delegasıasynyń qorjynyna túsken 3-medal. Osyǵan deıin Kanvondoda shańǵymen tuǵyrdan sekirýde Ilá Mızernyh altynnan alqa taqsa, short-trekshi Polına Omelchýk 1000 metrge jarysta úzdik úshtikti túıindedi. Qazir Qazaqstan jalpy esepte 1 altyn, 2 qola medalmen 14-satyǵa kóterildi. Azıa qurlyǵynda alǵash ret ótip jatqan keshendi jarys qazirdiń ózinde Qazaqstan úshin tarıhı nátıjemen este qaldy. Osyǵan deıingi oıyndarda otandastarymyz chempıon atanbaǵan edi. Jasóspirimder Olımpıadasy 2 aqpanda máresine jetedi.
Joǵalǵan adamnyń kóbi Almatydan
Bas prokýratýranyń Quqyqtyq statısıka jáne arnaıy esepke alý jónindegi komıtetiniń derekteri boıynsha qazirgi ýaqytta 10 178 adam izdestirilýde, olardyń 2 098 habar-osharsyz joǵalǵandar.
Joǵalǵan adamdardyń kóp bóligi Almaty qalasynda — 278 adam, sodan soń Qaraǵandy — 217, Pavlodar — 170, Almaty oblystarynda — 152 adam tirkelgen, dep habarlaıdy Almaty-akshamy.kz.
Úıden ketip, oralmaǵan — 1 572 adam, avtokólikpen joǵalǵan — 73, jumystan ketken — 38 adam dereksiz.
Ótemaqy ótirik pe?
Messendjerler men áleýmettik jelilerde QR Eńbek jáne halyqty áleýmettik qorǵaý mınıstrligi QQS úshin ótemaqy engizgeni týraly taratylyp jatqan aqparat shyndyqqa janaspaıdy.
«Áleýmettik kómektiń mundaı túri joq ekenin habarlaımyz. Tıisinshe, habarlamada kórsetilgen silteme alaıaqtar úshin azamattardyń jeke derekterin alý tásili bolýy múmkin. Alaıaqtarmen ózara árekettesýdi boldyrmaý úshin siltemege ótpeýge keńes beremiz», — dep jazdy vedomstvodan.
Prezıdent Footlab-qa bardy
«Smart Football» jaýapkershiligi shekteýli seriktestiginiń quryltaıshysy Murat Medeýovtiń aıtýynsha, fýtbol akademıasynda 5 jastan 12 jasqa deıingi 1000-ǵa jýyq balany jattyqtyrý josparlanǵan.
Footlab – sportsúıer qaýymǵa, otbasylyq demalysqa, balalar men eresekter arasynda týrnırler ótkizýge arnalǵan ınteraktıvti fýtbol alańy.
Saqtandyrsań – saqtaıdy!
Jer silkinisinen keıin jyljymaıtyn múlkin saqtandyrýshylar kúrt kóbeıdi. Tabıǵı apattan keıin baspana búlinse kompanıa shyǵyndy tolyq ótep beredi.
Zańgerdiń aıtýynsha, eger azamat arnaıy saraptama jasaý arqyly keltirilgen shyǵyn onyń ǵımaratyna sapasyz qurylystyń saldarynan bolǵanyn dáleldese, ol sotqa júginý arqyly óziniń shyǵynyn tolyq ótep alýǵa quqysy bar.
Saqtandyrý aqysy, ıaǵnı páterler men turǵyn úılerdiń ózindik qunynan 0,1 paıyzynan bastalady.
Jer Anań taǵy silkindi!
QR Tótenshe jaǵdaılar mınıstrliginiń seısmologıa ınstıtýty 25 qańtarda Qytaı aýmaǵynda bolǵan birneshe jer silkinisin tirkedi. Almaty ýaqytymen 10 saǵat 21 mınýt 57 sekýndta tirkelgen birinshi jer silkinisiniń oshaǵy Almatydan ońtústik-shyǵysqa qaraı 282 shaqyrym jerde Qytaı aýmaǵynda ornalasqan.
Jer silkinisiniń energetıkalyq klasy – 10,0. MPV magnıtýdasy — 4.3. Qazaqstan aýmaǵynda sezilgen joq.
Almaty ýaqytymen 10 saǵat 29 mınýt 52 sekýndta tirkelgen ekinshi jer silkinisiniń oshaǵy Almatydan ońtústik-shyǵysqa qaraı 273 shaqyrym jerde Qytaı aýmaǵynda ornalasqan.
Jer silkinisiniń energetıkalyq klasy – 9,6. MPV magnıtýdasy — 4.5. Qazaqstan aýmaǵynda sezilgen joq.
Almaty ýaqytymen 10 saǵat 54 mınýt 54 sekýndta tirkelgen úshinshi jer silkinisiniń oshaǵy Almatydan ońtústik-shyǵysqa qaraı 259 shaqyrym jerde Qytaı aýmaǵynda ornalasqan.
Jer silkinisiniń energetıkalyq klasy — 10.2. MPV magnıtýdasy — 4.6. Qazaqstan aýmaǵynda sezilgen joq.
Almaty ýaqytymen 10 saǵat 59 mınýt 21 sekýndta tirkelgen tórtinshi jer silkinisiniń oshaǵy Almatydan ońtústik-shyǵysqa qaraı 258 shaqyrym jerde Qytaı aýmaǵynda ornalasqan.
Jer silkinisiniń energetıkalyq klasy – 11,5. MPV magnıtýdasy — 5.2. Qazaqstan aýmaǵynda sezilgen joq.
Toqaev Almatydaǵy sýmen qamtý nysandarynyń qurylysymen tanysty
Prezıdentke «Kaptaj», «Bastaý» toǵandarynan jáne «Medeý» súzgi stansıasynan keletin sýdyń osy rezervýarlarda jınaqtalyp, zararsyzdandyrylatyny jóninde málimet berildi.
Tazalanǵan aýyzsý arnaıy ornatylǵan sorǵylardyń kómegimen Kamenskoe plato, Kólsaı, Iýbıleınyı jáne Muztaý yqshamaýdandarynyń magıstraldy jelileri arqyly taratylady.
Prezıdenttik ádebı syılyq tabystaldy
Almatyda Mádenıet jáne aqparat mınıstri Aıda Balaeva jas jazýshylar men aqyndarǵa Prezıdenttik arnaýly ádebı syılyq tabys etti.
«Proza» nomınasıasy boıynsha Jylqybaı Dosqannyń «Kvant» týyndysy, «Poezıa» nomınasıasy boıynsha Edilbek Dúısenovtiń «Qalalyq qustar» óleńder toptamasy, «Dramatýrgıa» nomınasıasy boıynsha Aıtolkyn Ashımovanyń «Taý kótergen Tolaǵaı» dramalyq týyndysy, «Balalar ádebıeti» nomınasıasy boıynsha Oljas Qasymnyń «Atyń ozsyn, azamat!» toptamasy júldeli orynǵa ıe boldy.